Тозија: Манчевски нека биде фер кон младите филмски автори


Резултатите од првиот конкурс на Агенцијата за филм за 2020 година кој требаше да биде објавен за април-мај месец треба да се очекуваат на крајот од јули, поради вонредната состојба предизвикана од пандемијата со Ковид-19.

Како што појасни директорот на Агенција за филм, Горјан Тозија на денешната средба со новинарите, нема доцнење во објавување на резултатите, бидејќи конкурсот на Агенцијата беше ставен во мирување за време на прогласената вонредна состојба, но со враќањето во новата нормала, процесот продолжува.

– Според Законот за Општата управна постапка, роковите престануваат да течат за време на вонредната состојба и продолжуваат по истекот на истата за онолку денови колку што преостанале. Според тоа, резултатите од Конкурсот за финансирање на производство на долгометражен и краткометражен, игран, документарен и анимиран филм за 2020 ќе бидат објавени кон крајот на месец јули, појасни Тозија.

Врз основа на процедурата за изборот на филмските проекти, рече, оценувањето на проектите се врши прво од рецензенти кои се главно надворешни лица со кредибилет знаење и умешност, а клучна е одлуката на Управниот одбор на Агенцијата, која директорот ја извршува.

Рокот за пријавување за Конкурсот за вториот рок е до 15 август, а резултатите треба да се очекуваат во октомври или ноември.

Поради кратењето на буџетот на Агенцијата од страна на Министерството за култура за 45 милиони денари од првично предвидените 175 милиони денари, Тозија информира дека предложиле до ресорното Министерство за годинава да има еден рок за пријавување на проектите, но тој предлог им бил одбиен.

Коментирајќи го незадоволството на режисерот Милчо Манчевски за конкурсот, Тозија рече дека не може да се коментира нешто, ако ги нема резултатите, а средствата може да бидат доделени по објавување на резултатите од конкурсот.

– Законот не е погазен, конкурсот не е завршен. Не може тој да ги знае резултатите дали ќе добие. Нека биде фер кон младите филмски автори кои со години чекаат да добијат шанса. Ние немаме толку можности да финансираме дебитанти. Со она што го почнавме да го применуваме последните три години се виде дека концептот на млади, на дебитанти со свежи идеи донесе успех. Ние имаме учество на 163 големи светски филсмки фестивали, над 65 награди. Тоа се резултати на филмаџиите, на авторите, а работа на Агенцијата е да ги поддржува и финансира. Голема е одговорноста на рецензентите и на УО. Од стотина филмови кои ќе се пријават ние можеме да финансираме десетина од сите жанрови, рече Тозија.

Во однос на исплатените средства за 27-те проекти во вкупна вредност од околу 35 милиони денари, за што било покрената постапка во Антикорупциска, Тозија појасни дека сите овие филмови се завршени со снимање и останува мал дел околу монтажата, поради што вели, нема потреба од банковна гаранција, а во случајов е активиран и членот од договорите кадекако причина за тоа е наведена виша сила.

– Ако филмот е 95 проценти завршен не може да го оптоварувате продуцентот во ваква ситуација да ви носи банковна гаранција. Потпишани се изјави од продуцентите да ги завршат сите обврски, а парите се дадени не за продуцентите туку за слободните филмски работници, кои се во моментов најзагрозени тие да бидат исплатени, рече Тозија додавајќи дека за овој хуман гест биле меѓу првите европски земји и биле поздравени од фелата.

Тој информира и дека со ратификацијата деновиве на Конвенцијата за европски филмски продукции се зголемуваат можности за учество во копродукции бидејќи лимитот е намален на пет осто од вредноста на проектот

Тој информира дека Агенцијата во соработка со Друштвото на филмски работници подготви Протокол за снимање филм во време на Ковид-19, кој е доставен до Комисијата за заразни болести и се чека на одобрување. Првиот филм кој ќе почне да се снима од јули е „Преекспониран“ на режисерката Елеонора Венинова.

За филмските фестивали во земјава во услови на пандемија, посочи дека иако се губи магијата на филмското платно, со цел да се запази традицијата тие ќе се одржат онлајн. При тоа за сите фестивали  е дадена можност да достават измени во програмите

На Канскиот филмски фестивал кој е во тек на Филмскиот маркет Агенцијата за филм е застапена со е-павилјон и ќе се претстави со осум трејлери за осум филмопви од кои шест се од млади автори.

Со цел запазување на транспарентноста во трошењето на буџетот Агенцијата за филм  издаде и брошура “Факти и Бројки” за 2019 година по теркот на многуте агенции за филм во Европа.