Трагедија во БиХ: Тинејџер загина додека чувал кози, влегол во минско поле

Деветнаесетгодишно момче загина на минско поле во Босна и Херцеговина, станувајќи уште една жртва на војната што се водеше во таа земја од 1992 до 1995 година, по што останаа бројни неексплодирани мини кои не се отстранети ниту по 30 години.

Инцидентот се случил во близина на Добој во централниот дел на Босна и Херцеговина, а младиот Мехмед Хасанамиџиќ загинал. Според достапните информации, тој бил убиен кога влегол во обележано минско поле.

„Тој беше сè за мене. Работеше, беше вреден. Заедно се боревме за корка леб. Одеше таму горе да се грижи за козите што често талкаа во минските полиња. Се обидуваше да ги врати. И тука нешто пукна“, изјави за порталот Аваз, Ферида Хасанамдижиќ, мајката на младиот човек што загина.

Семејството живеело во селото Хоџиќи, од кое Бошњаците биле протерани за време на војната, но многу семејства решиле да се вратат. Неколку други селани исто така биле убиени или сериозно повредени од мини во минатото.

Според податоците од Босанскиот центар за акција против мини (MAC), 1.781 лице е повредено од мини во Босна и Херцеговина од крајот на војната, од кои 624 починале. 53 деминери ангажирани во расчистување на мински полиња, исто така, починале.

Повеќе од 800 квадратни километри од Босна и Херцеговина се уште се минирани, а се проценува дека таму има повеќе од 170.000 мини. Повеќе од 132.000 луѓе живеат во области во близина на мински полиња.