Тенискиот ас диктира стил и на терен: Федерер во црно на „Уникло“ на УС опен
САД – Општо познато е дека ако сакате да изгледате како вистински њујорчанец треба да сте облечени само во црно. Роџер Федерер ќе го направи токму тоа кога ќе излезе на теренот на стадионот „Артур Еш“ за време на УС опен оваа недела во елегантна, целосно црна униформа на „Уникло“. Можеби се чини како далеку од типичните бели или црвени тениски парчиња на Федерер, но темната, монохроматска униформа ги вклучува сите делови од стилот што го сака Федерер – крагна, техничка мрежа и малку бела декорација. Што е уште поинтересно, изгледот го создадоа истражувачките и дизајнерски тимови на јапонскиот бренд „Уникло“ во Париз, на чело со Кристоф Лемар, што значи дека оваа спортска униформа е подготвена и за модната недела.
А, можеби ќе видите и некои од редовните посетители на шоуата за колекциите пролет 2020 кои ќе носат од новите црни тениски парчиња на Федерер. Целиот комплет ќе биде пуштен во продажба во продавниците на „Уникло“, дозволувајќи им на тениските и модните професионалци да го добијат овој изглед. Уште подобро: самиот Федерер ќе се појави во продавницата на „Уникло“ лоцирана на Петтата авенија, во разговор со Дерек Бласберг. Првите 150 клиенти во продавницата – која ќе се отвори рано во 9 часот наутро – кои ќе потрошат над 75 американски долари ќе добијат билет за ексклузивниот разговор. Којзнае, можеби и ќе го видите секогаш модерниот Федерер веднаш како си одбира нови парчиња веднаш потоа. Иако вели дека нема многу време да ги разгледува по полиците додека е во Њујорк, тој признава дека продавниците на Петтата авенија му се едни од омилените.
„Ми се допаѓа што можам да најдам буквално сè во Њујорк“, изјави тој за „Вог“.
Како се решивте за целосно црна облека за УС опен? Дали сметате дека резонира со њујоршките вибрации?
– Њујорк ми е секогаш омилената станица на турнејата. Сакав да доведам нешто поинакво на УС опен и сметам дека црниот аутфит е силен финален изглед за Гренд слем. Исто така, резонира со моите сеќавања кога играв овде навечер под светлата.
УС Опен привлекува прилично модерни луѓа. Дали чувствувате поголем притисок да имате одреден изглед овде наспроти другите турнири?
– Притисокот е секогаш присутен. Тука чувствувам зголемено чувство за стил. Среќен сум што соработувам толку блиску со Кристоф Лемар, уметничкиот директор на Центарот за истражување и развој во Париз на „Уникло“, и размислувањето што заостанува зад естетиката или традициите на секоја локација на турнирот, поврзана со моите параметри за стил.
Дали има некои специфични правила што може, а што не, кога станува збор за облеката на тениските мечови?
– Удобноста е секогаш на прво место. Тимот за дизајн на „Уникло“ е посветен за секој детаљ да биде совршен, а јас трошам време тестирајќи различни кроеви и технологии на ткаенини за да се осигурам дека можам да ги направам сите мои потези.
Дали приватниот стил има некаков потпис што сакате да го вметнете во облеката за на терен?
– Секогаш ми се допаѓа добро парче во слоеви – без разлика дали е надвор од теренот со ролка или на теренот со јакна на патент.
Сега, откако веќе една година сте во партнерство со „Уникло“, дали сте виделе многу луѓе што носат облека со иницијалите РФ? Како се чувствувате кога гледате луѓе што го имитираат вашиот стил?
– Да! Ја сакам пристапноста на „Уникло“. Бидејќи не е типичен бренд за спортска облека, носи поширока публика во светот на тенисот. И во исто време, ги воведува љубителите на тенисот во некои неверојатни секојдневни суштински производи по кои е познат брендот. Прекрасно е да гледате како обожавателите се навлекуваат исто колку и јас.