Технолошкиот сектор на Волстрит закрепнува, „Нвидиа“ во плус девет проценти

На Волстрит, индексот S&P 500 порасна во вторникот, исто како и Насдак, што главно се припишува на закрепнувањето на цените на акциите во технолошкиот сектор, по големиот пад претходниот ден.

Дау Џонс зајакна 0,31 отсто на 44.850 поени, S&P 500 порасна за 0,92 отсто на 6.067 поени, а Насдак индексот порасна за 2,03 отсто на 19.733 поени.

Индексот на технолошкиот сектор S&P 500 порасна за 3,6 отсто, а секторот на производители на чипови за 1,1 отсто.

Така, овие сектори вратија дел од загубите од претходниот ден, кога ги потресе веста дека кинеската стартап компанија DeepSeek развила апликација базирана на вештачка интелигенција која можеби е подобра од американските конкуренти, а и поевтина.

По падот од 17 отсто еден ден претходно, цената на акцијата на „Нвидиа“, најголемиот светски производител на чипови за вештачка интелигенција, вчера порасна за речиси девет отсто.

И покрај закрепнувањето на пазарот, инвеститорите се внимателни, на што укажува и падот на обемот на тргување. На американските берзи вчера се сменија околу 13,8 милијарди акции, а претходниот ден повеќе од 17 милијарди.

На азиските берзи во среда се тргува мирно, со скромен промет, бидејќи многу земји се затворени поради лунарната нова година, пренесува Хина.

Јапонскиот индекс Никеи во седум часот порасна за околу 0,8 отсто, додека цените на акциите во Австралија пораснаа за 0,6 отсто. Берзите во Кина, Хонг Конг, Јужна Кореја и Тајван се затворени поради празници.