Таравари: Влен го зафати политичка амнезија, влезе во илузија

Откако Влен денеска соопшти дека ДУИ била вмешана во влезот на Алта банка во Македонија, Арбен Таравари, претседателот на Алијансата за Албанците, реагираше дека владиниот коалициски партнер го зафатила политичка амнезија.

„Алта банка официјално влезе во Северна Македонија во септември 2025 година. Во тоа време, дел од владата беше Влен, а и денеска е дел од кабинетот.

Но, гледајќи ги денешните реакции на претставниците на Влен, се чини дека станува збор за класичен случај на селективна политичка амнезија: виновниците се бараат насекаде, само не таму каде што треба!

Не знам дали ова е политичка илузија, потценување на интелигенцијата на граѓаните или обид луѓето да се третираат со терапија на колективно заборавање.

Но, едно е непобитно: Алијанса за Албанците предупреди навреме!

Уште од моментот кога беше објавено влегувањето на оваа банка, ја изразивме нашата загриженост дека преку неа би можело да се прошири влијанието на српскиот свет во Северна Македонија, овојпат и во економската и финансиската сфера. Нашите предупредувања ги поткрепивме и со загриженоста изразена во извештајот на Европската комисија во врска со влијанието на српскиот свет во земјата.

Понекогаш, одговорноста не се мери според тоа колку успешно успеваш да ја префрлиш вината на другите, туку според тоа што си направил кога си имал можност да го спречиш проблемот“, стои во соопштението.