Светлана Тихановска му даде рок на Лукашенко да поднесе оставка до 25 октомври

Барањето на опозиционерката во егзил доаѓа откако белоруските власти го засилија насилството и се заканија со употреба на боева муниција

ВИЛНУС – Прогонетиот белоруски лидер на опозицијата, Светлана Тихановска, во вторникот постави рок до 25 октомври за претседателот Александар Лукашенко да поднесе оставка или да се соочи со национални штрајкови што ќе ја парализираат земјата.

Ултиматумот се случи откако властите ја интензивираа борбата против антивладините протести оваа недела, користејќи водени топови, солзавец и ракетни пиштоли. Во понеделникот полицијата се закани дека ќе употреби боево муниција на улиците.

Ако Лукашенко не објави оставка, не запре насилството и не ги ослободи политичките затвореници, „на 26 октомври, сите претпријатија ќе започнат штрајк, сите патишта ќе бидат блокирани, државните продавници веќе нема да имаат продажба“, се вели во изјавата на Тихановска.

Тихановска, чии следбеници велат дека таа победила на претседателските избори на 9 август, по гласањето, на кое Лукашенко беше прогласен за победник, побегна во соседна Литванија.

Помошник на Тихановска за Ројтерс изјави дека новиот ултиматум е објавен како одговор на заканата за употреба на смртоносно оружје и зголемено полициско насилство на улиците. Тихановска очекува дека Западот ќе ги поддржи нејзините барања, рече помошникот.

Десетици илјади Белоруси демонстрираа деветти викенд по ред, барајќи Лукашенко да се повлече. Лукашенко негира изборни измами и вели дека протестите се поддржани од странство.

Министрите за надворешни работи на Европската унија во понеделникот се согласија да го додадат Лукашенко на списокот на белоруски официјални лица погодени од забрани за патување и замрзнување на средствата заради кризата.

Лукашенко во саботата отиде во затвор на КГБ во Минск каде се сретна со неколку притворени фигури на опозицијата, вклучувајќи го и Виктор Бабарико, политичар кој беше приведен во јули и му беше забрането учество на изборите.

Државната новинска агенција Белта соопшти дека Лукашенко зборувал за предложените измени на уставот, за реформите изнесени како начин за ставање крај на политичката криза, но за кои неговите критичари сметаат дека се работи за тактика.

На една од лидерките на опозицијата која е во затвор, Марија Колесникова, ѝ било понудено да учествува на состанокот со Лукашенко во затворот на КГБ, но таа одбила. Ова го соопшти нејзиниот адвокат Александар Пилченко за радиото Ехо на Москва.

„Во петокот двајца убави мажи дојдоа кај Марија, како што рече таа, и разговараа со неа на оваа тема, дали сакате да разговарате [со Лукашенко]. Марија е толку креативна девојка, очигледно, малку ги исплаши. Таа рече: зошто да комуницираме сега, пред еден месец и половина понудивме да престанеме со сето ова [насилство], сега сите се во затвор или протерани од земјата. Освен тоа, не се претставивте, доволно е, тие веќе ме носеа околу Белорусија околу ден и половина, а јас не знаев каде сум. Сега, рече таа, во Зодино, во одделот за изолација, таа е побезбедна отколку да патува со странци“, рече Пилченко. (Ројтерс)