Судот во Турција пресуди, Озгур Озел останува лидер на најголемата опозициска партија

Во петокот, судот во Турција донесе одлука со која ја отфрли тужбата во врска со конгресот на најголемата опозициска партија во оваа земја, каде што Озгур Озел беше избран за лидер на оваа партија.

Судот одлучи за процесот од годишниот конгрес на Републиканската народна партија во 2023 година, каде што Озел беше избран за нов лидер.

Озел се здоби со популарност по апсењето во март на градоначалникот на Истанбул, Екрем Имамоглу, претседателски кандидат на неговата партија и главен политички ривал на претседателот Таип Ердоган.

Центристичката Републиканска народна партија, која ги негира обвинувањата против неа, е изедначена со конзервативната Партија на правдата и развојот  на Ердоган во повеќето анкети.

Доколку судот го поништеше конгресот и го отстранеше Озел, најверојатно ќе назначеа комесар да ја води партијата или ќе го вратеа поранешниот претседател Кемал Киличдароглу, кого Ердоган го победи на изборите во 2023 година, но кој оттогаш изгуби голем дел од довербата во Републиканската народна партија.

Сепак, на крајот, судот донесе одлука целосно да го отфрли овој случај.

Минатиот месец, РНП се обиде да го заштити Озел од можна судска пресуда со тоа што повторно го избра за лидер на вонреден партиски конгрес.

Стотици членови на РНП беа затворени во посебна, едногодишна акција што критичарите на владата ја нарекуваат политизирана и антидемократска. Владата го негира ова, тврдејќи дека судството е независно.