Студија во Финска: „Ноќните птици“ не умираат порано, освен ако пијат и пушат

Луѓето кои остануваат будни до доцна нема да умрат помлади од ранобудниците, сè додека не ги користат тие долги ноќи за да пијат и пушат, покажа 37-годишно истражување.

Претходните истражувања покажаа дека луѓето кои остануваат будни до доцна и се борат да станат од кревет имаат поголема веројатност да страдаат од низа здравствени проблеми. Во 2018 година, голема студија во Британија покажа дека „ноќните птици“ имаат 10 отсто поголем ризик од смрт во период од 6,5 години.

Иако ова беше потенцијално загрижувачка вест, студијата не ги зема предвид факторите како што се консумирање алкохол или пушење. Така, истражувачите во Финска се обидоа да дознаат повеќе во студијата објавена во списанието Chronobiology International. Истражувањето следело речиси 24.000 истополови близнаци кои во 1981 година одлучиле дали се утрински или вечерни типови на личност. Третина рекле дека донекаде се вечерни типови, додека 10 проценти рекле дека дефинитивно се. Другите биле утрински тип. Вечерните типови биле главно помлади и повеќе пиеле и пушеле. До 2018 година, повеќе од една третина од близнаците умреле.

Разликата главно се должи на алкохолот и цигарите

Во текот на 37 години, истражувачите откриле дека „ноќните птици“ имале девет проценти поголем ризик од смрт од сите причини, стапка слична на онаа во студијата од 2018 година. Таа разлика е „главно поради пушењето и алкохолот“, се заклучува во финската студија.

На пример, беше откриено дека непушачите кои пиеле малку не умреле порано. Водечкиот автор на студијата, Кристер Хаблин од Финскиот институт за здравје, изјави за АФП дека ноќните обрасци треба да се променат доколку сакаат да го намалат ризикот од рана смрт.

„Очигледно е дека вечерните типови треба критички да размислуваат за количината на алкохол и тутун што ја консумираат“, рече тој.

Ако овие фактори на ризик се стават настрана, времето на спиење или нивниот хронотип има „мал или никаков“ придонес за нивната смртност, додаде Хаблин.