Стратешкиот форум во Блед со фокус на европската безбедност, Западен Балкан и геополитичката ситуација

Љубљана –   Стратешкиот форум во Блед во Словенија започнува денеска со фокус на европската безбедност, иднината на Европската Унија, Западен Балкан и геополитичката ситуација.

Овогодинешното издание на Стратешкиот форум во Блед, 21-во по ред и што се одржува денеска и утре, ќе биде под темата „Моќта на ко-креирањето на иднината“, со фокус на иднината на Европа. Потврдени се над 150 говорници од над 70 земји.

Стратешкиот форум во Блед традиционално ги собира лидерите, политичарите, иноваторите, претставниците на бизнисот, експертите и младите луѓе од целиот свет на крајот на летото за да дискутираат за актуелните глобални и регионални прашања.

„Главниот фокус на дискусиите ќе биде иднината на ЕУ од перспектива на безбедноста и конкурентноста, како и од економска перспектива, со посебно внимание посветено на завршувањето на процесот на проширување на ЕУ, изјави генералниот секретар на форумот, Петер Гурк.

„Знаеме дека ова е една од темите што е од клучно и стратешко значење за ЕУ, а особено за Словенија, па затоа се надеваме дека ќе најдеме некои одговори за тоа како да го завршиме овој процес што е можно побрзо“, рече тој, јави Словенечката телевизија.

За разлика од претходните години, оваа година највисоките претставници на ЕУ нема да бидат присутни на форумот. Во дискусиите ќе учествуваат само четворица комесари на ЕУ, вклучувајќи ја и словенечката комесарка Марта Кос, која е одговорна за проширувањето.

Се очекува министрите за надворешни работи да разговараат за тоа како земјите од Југоисточна и Централна Европа се справуваат со геополитичката бура на посебен панел. 

Министерот за надворешни работи и надворешна трговија, Тимчо Муцунски, денеска и утре, ќе учествува на 21. меѓународна конференција – Бледски стратешки форум, во Блед, Словенија.

– Во рамките на Форумот, кој оваа година се одржува на тема „Моќта да ја обликуваме иднината“, Муцунски ќе биде говорник на панел-дискусијата „Геополитички превирања: Централна и Југоисточна Европа во свет на коридори, безбедност и проширување“, во рамките на која ќе бидат разгледани геополитичките трансформации што ги редефинираат меѓународните односи – наведуваат од МНРиНТ.

Покрај учеството во официјалната програма, министерот Муцунски ќе присуствува и на работен појадок со министрите за надворешни работи од регионот, на кој ќе се направи пресек на актуелните состојби и предизвици на Западен Балкан.

Од Министерството додаваат дека на маргините на настанот предвидено е министерот Муцунски да оствари повеќе билатерални средби со колеги министри, како и со претставници на меѓународни организации, учесници и гости на Форумот.