Српски државјанин обвинет за тешки дела против безбедноста во сообраќајот


Илустрација

Основното јавно обвинителство Скопје до судот поднесе обвинителен предлог против државјанин на Република Србија кој со камион на 18 јуни годинава предизвикал сообраќајна несреќа на булеварот „Киро Глигоров“ во Скопје во која животот го загубил мотоциклист.

Обвинетиот како учесник во сообраќајот на јавните патишта, не се придржувал кон прописите и со тоа го загрозил јавниот сообраќај и го довел во опасност животот на луѓето.

– На критичниот ден тој управувал со товарно моторно возило – влекач марка „Мерцедес Бенз/Акрос“ и приколка „Кассбохрер“ натоварена со четири моторни возила, сопственост на фирма од Р. Србија. Тој се движел по крајната лева сообраќајна лента на булеварот „Киро Глигоров“ и пристигнал на крстосницата со улицата „Индустриска“. Тогаш навлегол свртувајќи лево кон „Индустриска“ без да го почитува првенството на минување на возилата кои доаѓале по булеварот „Киро Глигоров“, иако бил свесен дека поради таквиот начин на управување може да настапи штетна последица. Во тој момент во задниот десен дел од товарното возило и предниот десен дел од приколката бил удрен од моторцикл марка „Кавасаки Z-750“, управуван од лице од Скопје, кој се движел по крајната десна сообраќајна лента на булеварот „Киро Глигоров“, од спротивна насока. Од повредите здобиени во несреќата, возачот на моторциклот починал, се вели во соопштението од ОЈО.

Надлежниот јавен обвинител до Судот достави и предлог за определување мерка притвор за обвинетото лице, кое по несреќата привремено е сместено во Центарот за странци – Прифатен центар Скопје.

Лицето е обвинето за кривично дело – Тешки дела против безбедноста на луѓето и имотот во сообраќајот од член 300 став 4 во врска со член 297 став 3 во врска со став 1 од Кривичниот законик.