Средба Спасовски – Клуге: Македонија успешно ги применува препораките на СЗО за корона вирусот

Македонија покажала висока подготвеност во примената на препораките на СЗО во однос на ситуацијата со корона вирусот, како во делот на превентивата, така и во реакциите за заштита и е успешен пример како треба да се постапува и за други земји.

Ова било констатирано на средбата на премиерот Оливер Спасовски со Ханс Клуге, регионален директор на Светската здравствена организација за Европа, кој бил придружуван од претставници на СЗО и од Џихан Тавилах, шефица на канцеларијата на СЗО во Скопје. Покрај премиерот Спасовски, на средбата биле и министрите за здравство, Венко Филипче, за финансии, Нина Ангеловска и заменикот министерот за надворешни работи, Андреј Жерновски.

На состанокот е разговарано за ситуацијата со Корона вирусот во светот и во земјава и за механизмите за заштита што ги преземаат државите, како и за реформите во здравството, со цел здрави граѓани.

На средбата се споделени најновите информации околу ситуацијата со корона вирусот и се констатирани како важни навремената информираност на граѓаните за мерките за самозаштита, доследно следење на препораките на СЗО од страна на надлежните државни институции и преземањето навремени мерки за изолација на потенцијални случаи што нашата држава го прави.

„Ги презедовме сите потребни мерки, според препораките на СЗО и сите други мерки за кои проценивме дека се потребни, со цел пресекување на патот на вирусот. Бевме свесни за можноста за појава на вирусот и во нашата држава и поради тоа ги направивме потребните подготовки. Кризниот штаб, формиран за справување со Корона вирусот, посветено ги следи новите информации и е подготвен да ги даде навреме потребните насоки за реакција“, рече премиерот Спасовски.

На средбата е разговарано и за важните реформи за здравствениот систем. Заеднички е посочена важноста од мотивирани здравствени работници кои ќе работат во својата родна земја. Нагласена е посветеноста кон здрави работници, кои на тој начин можат да бидат продуктивни и во економијата. Заеднички е изразена определба кон развивањето култура на здравје и здрав начин на живот, кон што нашата држава, како што е речено, е подготвена да работи заедно со СЗО, како земја која е определена кон почитување и придонес кон европските критериуми и вредности.

Во оваа насока, оценето е дека земјава е на вистинскиот пат и дека треба да продолжи со реформите што се од значење на граѓаните.

Претставниците од СЗО од Европа, се тука за вториот Национален форум „Здрави мајки, здрави новороденчиња: Северна Македонија одговара на предизвиците“, соопшти владината прес-служба.