Спречување на илегалната миграција; Италија му нуди на Тунис 105 милиони евра државни пари и заеми

Италија ќе му помогне на Тунис со 105 милиони евра државни пари и кредитни линии, објави во средата кабинетот на премиерот Џорџија Мелони, како дел од напорите на Рим да ги зајакне економските врски со африканските земји и да ја спречи илегалната имиграција во европските земји.

„Енергијата е едно од прашањата во кои мора да продолжи зголемената соработка меѓу Италија и Тунис“, рече Мелони по средбата со тунискиот претседател Каис Саид.

Како дел од неколку договори, Рим му понуди на Тунис 50 милиони евра државни пари за да и помогне на земјата да ги промовира проектите за енергетска ефикасност и обновливи извори на енергија, изјави претставник од кабинетот на премиерот Мелони.

Вториот договор предвидува заем од 55 милиони евра, а е наменет за поддршка на малите и средни туниски компании, изјави истиот функционер.

Мелони рече дека Рим сака да направи повеќе кога станува збор за охрабрување на редовната миграција и следење на минатогодишниот договор да им дозволи на околу 12.000 квалификувани работници од Тунис да влезат во Италија во период од три години.

„Мислам дека Италија може многу повеќе“, рече Мелони.

Според податоците на италијанското Министерство за внатрешни работи, од јануари до 17 април во Италија пристигнале околу 16.000 мигранти, од кои 2.224 од Тунис, наспроти повеќе од 34.000 мигранти кои пристигнале во истиот период минатата година.