Специјалниот завод Демир Капија доби донација „УВ Гард“ за дезинфекција на површини и воздух

ЈУ Специјален завод Демир Капија, денеска доби донација „УВ Гард“ – уред со УВ зраци за дезинфекција на површини и воздух од вируси и бактерии, информираат од Министерство за здравство.

Функционалноста на овој апарат како што инфомираат од Минстерството е повеќе наменска, почнувајќи од дезинфицирање на површини и воздух, 360 степени наоколу, работење на принцип на зрачење кратка UV-C бранова должина од 254 нанометри.

– Ги убива микроорганизмите кои доаѓаат во контакт со светлината, им ги уништува нуклеинските киселини и ја нарушува нивната ДНК, оставајќи ги без можност да ја вршат својата функција. Просторијата што се дезинфицира мора да биде празна, но тоа не е проблем бидејќи уредот се контролира од далечина и го заштитува тој што го ракува. УВ зраците допираат до места кои се недостапни и стопроцентно ги елиминираат вирусите и бактериите и на нерамни површини. За просторија од 40 квадратни метри се доволни околу триесетина минути, а веднаш по дезинфекцијата се чувствува силен мирис на озон, информираат од Министерство за здравство.

Целта според министерството е зајакнување на условите во установите при состојба со ковид-19. Досега, „УВ Гардови“ покрај заводот во Демир Капија добија и Клиниката за инфективни болести и фебрилни состојби, Градската општа болница „8 Септември“, Клиниката за очни болести, Клиниката за пулмологија и алергологија, Општата болница Гостивар, Општата болница во Прилеп и Општата болница во Кавадарци. Овој апарат е донација од македонските иноватори Ивица Поцков и Никола Глигоров.