Спасов контра Заев за бугарските фашисти


Македонија во свеста на постарите, но и на помладите генерации, во Бугарија е мит за „братот од другата страна на границата“, оценува Спасов
Екс-амбасадорот на Македонија во Бугарија, Ѓорѓи Спасов, реагираше на најавата од премиерот Зоран Заев дека од спомениците и од учебниците ќе се брише описот „бугарски“ пред  фашистички окупатор. Тоа, смета Спасов, не можеме да си го дозволиме поради жртвите од фашизмот.  
 
„Имало ли бугарски фашисти во Македонија во време на Втората светска војна, како што имало и италијански фашисти и германски нацисти и фашисти? Имало. И тоа е историски факт запишан во сите светски енциклопедии и историски учебници.
 
Ако на некој споменик во Македонија пишува дека тој и тој народен херој е убиен од бугарските фашисти во време на Втората светска војна, тоа не треба да ги навредува Бугарите освен ако сметаат дека за време на Втората светска војна не постоеле бугарски фашисти и окупатори на туѓи територии, туку само ‘ослободители и администратори’.
 
Тие може да сакаат да си ја разубавуваат својата национална историја со бројни фалсификати, но ние во име на жртвите во борбата против фашизмот тоа не смееме да го прифатиме, особено не како услов за члентво во ЕУ. Можно е само да допишеме таму кај што треба дека се тоа жртви на бугарските фашисти од време на Втората светска војна и ништо повеќе“, напиша Спасов на Фејсбук.