SpaceX на Илон Маск не сака веќе да плаќа за сателитските услуги во Украина

SpaceX на Илон Маск му соопшти на американското Министерство за одбрана дека повеќе не може да продолжи со финансирање на сателитската мрежа Старлинк за Украина и побара тоа да ги преземе трошоците. Ова го објави Си-Ен-Ен, кој ги имаше на располагање документите на компанијата.

По почетокот на војната во Украина, SpaceX одлучи да ѝ обезбеди на украинската страна пристап до глобалниот сателитски интернет систем Старлинк. На 1 март во земјава пристигна првата серија терминали кои обезбедуваат поврзување со сателитски комуникации.

Како што е наведува Си-Ен-Ен, терминалите на Старлинк се потребни за комуникациската инфраструктура на Украина. Сателитските комуникации, меѓу другото, ги користи и украинската војска, која ги користи за координирање на акциите на единиците, контрола на беспилотни летала и корекција на артилерискиот оган.

Директорот за јавни набавки на SpaceX испрати писмо до Пентагон на 8 септември, според документите до кои дојде Си-Ен-Ен, во кое се наведува дека трошоците за одржување на сателитската мрежа за Украина станале превисоки, приближувајќи се до 100 милиони долари.

„Не можеме да продолжиме да испорачуваме терминали за Украина или да ја финансираме работата на веќе испорачани терминали на неодреден временски период“, се вели во писмото.

Портпаролот на SpaceX побара од американската војска да покрие тековните трошоци од 124 милиони долари и да го финансира Старлинкk за Украина до крајот на 2022 година. Компанијата, исто така, предупреди дека сателитското финансирање може да достигне 400 милиони долари во 2023 година.

SpaceX исто така побара од Пентагон да го прифати новото барање на Украина за набавка на терминали за Старлинк. Според Си-Ен-Ен, во јули врховниот командант на вооружените сили на Украина, Валериј Залужни, му се обратил на шефот на SpaceX, Илон Маск, истакнувајќи ја „исклучителната корисност“ на Старлинк. Тој рече дека околу 4.000 терминали се на располагање на украинската војска, но околу 500 од нив се уништуваат секој месец за време на борбите.

Залужни побара од Маск да обезбеди 6.200 дополнителни терминали за украинските војници и разузнавачки агенции, како и уште 500 комплети опрема месечно за да ги надомести загубите. Како одговор, пишува Си-Ен-Ен, SpaceX соопшти дека барањето на врховниот командант на вооружените сили на Украина го пренасочиле до Пентагон.

Во посебно мотивациско писмо до Пентагон, надворешен консултант за SpaceX посочи дека компанијата „се соочува со ужасно тешка одлука“. „Не мислам дека тие имаат финансиска можност да обезбедат какви било дополнителни терминали или услуги на барање на генералот Залужни“, рече тој.

Откако SpaceX ѝ даде пристап на Украина до Старлинк, Маск доби „широко признание и благодарност“ иако голем дел од терминалите и услугите на сателитскиот систем беа платени од извори од трети страни, се вели во текстот на Си-Ен-Ен.

Околу 85% од 20.000 терминали на Старлинк во Украина биле платени целосно или делумно од Полска, Велика Британија и САД, како и од кампањи за групно финансирање и невладини организации, според податоците на SpaceX доставени до Пентагон. Тие извори платиле и околу 30% од услугите за постојана интернет конекција, која според SpaceX чини 4.500 долари месечно. Останатите 70% беа финансирани од самата компанија.

На 7 октомври, Маск објави на Твитер дека SpaceX потрошил 80 милиони долари за снабдување и одржување на терминалите на Старлинк во Украина, а трошоците на компанијата ќе надминат 100 милиони долари до крајот на годината.

Барањето на Маск да се плати Старлинк за Украина ги иритираше претставниците на Пентагон, пишува Си-Ен-Ен. Висок претставник на агенцијата изјави за ТВ-мрежата дека SpaceX „има смелост да изгледа како херои“, додека другите плаќаат толку многу за нивните услуги, а сега наплаќа десетици милиони долари месечно.

Како што забележува Си-Ен-Ен, барањата на SpaceX станаа познати по извештаите за големи неуспеси во работењето на Старлинк за време на украинската контраофанзива, како и по скандалот предизвикан од предлозите на Илон Маск за условите за мировен договор меѓу Русија и Украина.