Советот на ЕУ ќе расправа за високите цени на производите

Советот на ЕУ ќе го разгледа прашањето за високите цени на производите, изјави полскиот министер за економски развој и технологија, Кшиштоф Пашик, за време на седницата на Комитетот за внатрешен пазар и заштита на потрошувачите на Европскиот парламент.

„Ова е итно, конкретно прашање што влијае на милиони граѓани во ЕУ. Можам да ви кажам дека го утврдивме постоењето на овој проблем во Полска и ќе водиме интензивен дијалог со Европската комисија и се надеваме дека Комисијата ќе ги иницира потребните предлози. „Значи, нашето претседателство ќе биде подготвено да соработува со Комисијата за ова прашање“, рече Пашик, чија земја претседава со Советот на ЕУ во првата половина на годината.

Темата за екстремно високите цени ја покрена хрватскиот пратеник Томислав Сокол, кој предупреди на ваквата практика во бројни земји од ЕУ.

„Еден од главните проблеми присутен во неколку земји-членки, вклучително и Хрватска, е оној на нефер трговски практики и големите разлики во цените на истите производи што се продаваат по различни цени во различни земји-членки“, посочи Сокол.

Тој нагласи дека податоците покажуваат дека има производи кои во земјите членки се продаваат по цена која е два до три пати поскапа од цената што истите производи ја постигнуваат на пазарот на земјата во која се произведуваат.

„Ова стана голем проблем за потрошувачите и минатата недела имавме голем бојкот на продавниците во Хрватска, поради што на денот на бојкотот приходите од продажба во продавниците беа намалени за повеќе од 50 проценти“, посочи Сокол.

Пратеникот потсети дека нефер трговските практики се регулирани на ниво на европското законодавство.

Бојкотот на малопродажните синџири започна во Хрватска и се прошири во Босна и Херцеговина и Црна Гора.