Сопственикот на „Дурмо Турс“ повторно бара одложување на издржување на казната поради здравствени причини

Сопственикот на „Дурмо турс“, Дурмиш Белули, повторно поднел барање за одложување на извршувањето на затворската казна, повикувајќи се на здравствени причини по неодамнешна хируршка интервенција. Според медицинската документација доставена до надлежните институции, по извршената операција му било препорачано мирување во период од 20 до 30 дена.

Белули требаше да се јави во казнено-поправната установа „Идризово“ за издржување на правосилно изречената казна, но повторно побара пролонгирање, образложувајќи дека моменталната здравствена состојба не му дозволува веднаш да започне со издржување на казната. Судот во наредниот период треба да оцени дали доставените медицински наоди претставуваат оправдана причина за ново одложување.

Ова не е првпат Белули да бара пролонгирање, што предизвикува реакции и голем интерес во јавноста. Тој е правосилно осуден за сообраќајната несреќа кај Ласкарци, во која загинаа 16 лица, а случајот се смета за еден од најтешките и најчувствителните судски предмети во земјава.

Надлежните институции, според законските процедури, треба да утврдат дали неговата здравствена состојба навистина претставува пречка за издржување на казната или дали може да биде згрижен и лекуван во рамките на затворскиот систем. Одлуката на судот се очекува во наредниот период.