Социјалистите му свртеа грб на Петков, ги прекинаа преговорите за нова влада


 

Протерувањето на 70 руски дипломати ја натера Бугарската социјалистичка партија (БСП) да ги прекине разговорите за формирање на нов кабинет со Продолжуваме со промените. Така, само Демократска Бугарија и неколку независни пратеници останаа да ја поддржат партијата на Кирил Петков и Асен Василев.

„Ги прекинуваме сите преговори со Продолжуваме со промените за формирање влада. Мотивот за ова е одлуката за протерување на 70 дипломати од Русија. Ова е без преседан, ова е прекин на дипломатските односи“, изјави лидерката на БСП, Корнелија Нинова.

„Ние од БСП за Бугарија категорично констатираме дека ваква одлука не е разговарана и донесена во Советот на министри. БСП долги години се бори за владеење на правото“, рече Нинова. 

Според неа, Петков носи лични одлуки за прашања кои ја засегаат националната безбедност.

„Досега покажувавме разбирање и толеранција, но бидејќи ова е уште една ваква одлука, ќе се вратиме на маса доколку Продолжуваме со промените предложат друг кандидат за премиер и Петков ја преземе одговорноста за неговото досегашно однесување“, додаде Нинова.

БСП ќе предложи сослушување на првиот човек на тајната служба на затворена седница на парламентот. Тие инсистираат претседателот Румен Радев да свика состанок на советот за национална безбедност, а Нинова изјави дека денешната изјава на претседателот била загрижувачка.

Радев денеска од Мадрид, каде е на самитот на НАТО, изјави: „Не можам да разговарам за ова прашање бидејќи ги немам потребните информации. Се надевам дека премиерот во оставка ја донесе оваа одлука врз основа на цврсти и веродостојни информации и ја разгледа добро – и во однос на обемот и според последиците“.

Од владејачката партија ПП се надеваат дека  БСП ќе ја преиспита својата одлука.

Одлуката на БСП да ги прекине преговорите за нов кабинет ќе биде разгледана на состанокот на парламентарната група на Продолжуваме со промената, рече нејзиниот претседател Андреј Ѓуров, повикувајќи ја левицата да ја преиспита својата реакција.

Тој го пренасочи прашањето дали Продолжуваме со промената се подготвени да предложат друг кандидат за премиер освен Кирил Петков.

„Досега не сме стигнале до фаза да разговараме за владиниот персонал, разговараме за формула и програма за обединување на сите коалициски партнери. Имаме рок до петок да го одработиме мандатот, така што сите опции се на маса“, рече Ѓуров.

Лидерот на Демократска Бугарија, Христо Иванов, рече дека нема политичка задача да се приклучи кон обвинувањата дека Кирил Петков носи индивидуални одлуки.

„Од првиот ден на оваа коалиција кажавме дека не е добро склопена и не функционира добро во одлучувањето. Мора да постои затоа што е подобро отколку земјата да оди во хаос“, рече тој.

„Денеска БСП разбра за што зборуваме еден месец. Долго време ги затвораа очите пред Кирил Петков. Но, мило ми е што БСП ја прави вистинската работа“,  изјави  Тошко Јорданов од Има таков народ.

„Кирил Петков не станува премиер. Тој не е човек од моќ. Кирил Петков е Бојко Борисов со диплома од Харвард – истиот одвратен диктаторски менталитет“, рече Јорданов. Тој рече дека може да има влада доколку во неа не се Кирил Петков и Асен Василев.