Со 100 гласа „за“ Собранието ја донесе декларацијата за Украина. Против беа Левица и Стоилковиќ
Пратениците во Собранието вечерва ја усвоија Декларацијата за осуда на воените напади кои го загрозуваат територијалниот интегритет и суверенитет на Украина, поднесена од пратеничките Моника Зајкова од ЛДП и Маја Морачанин од ДОМ по скратена постапка.
За Декларацијата гласаа 100 пратеници од целиот политички спектар. Против беа само двајцата пратеници на Левица, Димитар Апасиев и Борислав Крмов, и претставникот на партијата на Србите, Иван Стоилковиќ. Левица својот став го образложуваше со потребата Македонија да се држела неутрално во овој конфликт.
Претходно, образложувајќи ја потребата од усвојување на Декларацијата, пратеничката Зајкова, облечена во боите на украинското знаме, рече дека низ историјата, човештвото сведочело за бројни војни и внатрешни конфликти, од кои цената ја плаќале само невини човечки животи.
„Жалам што во 21. век сведочиме повторно на напад на мирот, предизвик кој на никој не ни доаѓаше ниту на сон дека ќе се соочуваме. Она што се случува денес во Украина, не е само предизвик на Украина и не ја засега само Европа или Азија, туку целиот свет. Ваквите напади, не го загрозуваат само мирот и безбедноста на Југоисточна Европа туку и мирот на Балканот“, рече Зајкова.
Таа изрази надеж дека овој пат пратениците ќе бидат единствени во донесувањето на декларацијата и оти, како што рече, војната не е метод за решавање на споровите.
„Во дипломатијата важи едно правило дека секое молчењето е согласност или одобрување, затоа не смееме да молчиме. Недозволиво е во 21. век да биде доведено во прашање постоењето на суверена и независна држава, мешајќи се во внатрешни работи, попречувајќи ги нејзините стратешки определби. Со оваа Декларација како владејачка коалиција, најостро ја осудуваме со ништо неиспровоцираната воена агресија на Русија врз Украина, која доколку итно не престане, светот ќе сведочи за огромни катастрофи и загуба на голем број човечки животи“, рече Зајкова.
Таа посочи дека случувањата во Украина се еклатантно кршење на меѓународното право, сериозна закана за европската безбедносна архитектура и го доведува во прашање мирот во целиот европски континент.
„Ниту една детска солза или траума нема да биде простена. Војната секогаш носи само уништување и смрт. Дури и најблагодарните мотиви, кои се облиени со крв, се само лицемерна амбиција, недостојна за цивилизираниот свет“, потенцираше пратеничката, која ги повика пратениците да ја донесат Декларацијата.