Славниот моден дизајнер Пако Рабан почина на 88 години

Модниот дизајнер Пако Рабан почина на 88-годишна возраст, објави „Монд“.

Пако Рабан е основач на куќата за висока мода „Пако Рабан“. Пако Рабан е роден во 1934 година во Баскија во Шпанија. Работеше во Париз. Тој ја започна својата кариера во светот на модата дизајнирајќи накит за „Живанши“, „Диор“ и „Баленсијага“. Во 1966 година, Пако Рабан ја основа својата модна куќа и ја претстави својата прва колекција облека во Париз. Облеките беа направени од нетрадиционални материјали – хартија, пластика и метал. Во 1969 година, Пако Рабан го претстави својот прв парфем „Calandre“.

„Монд“ забележува дека „смелиот избор на материјали, начинот на нивна обработка, авангардната визија и креативната слобода“ на Пако Рабан влијаеле на цела генерација на дизајнери.