„Скопје прајд“ под мотото „Излези за љубов! достоинство, еднаквост, правда“

Под мотото „Излези за љубов! достоинство, еднаквост, правда“, се одржува овогодинешното издание на „Скопје прајд“. Почетна точка беше во паркот „Жена-борец“ во Скопје, од каде што во 19 часот тргна третата по ред скопска парада на гордоста кон Стадионот на АРМ, каде што се одржува пригодна програма и на која настап има овогодишната македонска претставничка на Евровизија, Андреа Коевска.

Покрај неа, настапуваат и оперската пејачка Наде Талевска, како и дрег кралици од земјава и од регионот, а со диџеј сетови ќе се претстават Андреј Мицајков, Јана Тодоровска, Мартина Пенева и Џинџер.

„Прајдот е крик во име на милионите луѓе соочени со социјално исклучување, нарушена телесна автономија и ограничен пристап до услуги кои се достапни за сите останати. Скопје Прајд, како и другите паради на гордоста, е празник на љубовта, ден на видливоста на маргинализираните и, секако, повод за славење на жилавоста на нашата борба за еднаквост“, порачаа пред собирот организаторите од Националната мрежа против хомофобија и трансфобија (НМХТ).

Непоимливо е во 21 век сè уште да сме сведоци на дискриминација само затоа што некој го живее животот според сопствена определба – сите ние сме луѓе и плаќаме еднакви даноци и имаме еднакви обврски, ред е да уживаме и еднакви прави во ова општество, порачаа учесниците на парадата.

– Тука сме за сите наши блиски и далечни, за сите наши познати и непознати, кои што биле избркани од дома затоа што се геј. Кои што биле избркани од работа затоа што се транс. И кои што биле физички и психички малтретирани затоа што не влегуваат во тесните рамки на она што некој го нарекува нормално, изјави Ева, водителката на програмата на Скопје Прајд 2022.

Потребна е, нагласи таа, силна институционална заштита и брза реакција против секој облик на насилство, но и образовен систем што, како што рече, нема да не учи да се мразиме и срамиме од самите себе.

На политичарите им порачаа дека сите плаќаат даноци, а не само стрејт, туку и геј, и би и транс луѓето и од пред Собранието побараа еднаквост пред законот. Тие, исто така, ги повикаа да го стават на дневен ред и Законот за матична евиденција со кој ќе се регулираат назнаките на транс-родовите лица, но и да се размислува за исти права за оние кои живеат во истополови бракови.

Меѓу присутните кои дадоа поддршка на Скопје прајд 2022 беа и вицепремиерот за европски прашања Бојан Маричиќ и министерката за труд и социјална политика Јована Тренчевска.

На социјалните мрежи пораки за поддршка упатија претседателот Стево Пендаровски и премиерот Димитар Ковачевски.

Парадата на гордоста во Скопје се одржува во организација на Националната мрежа против хомофобија и трансфобија.