Скопје ќе почувствува музичка магија и празнична еуфорија, вели Симон Трпчески пред новогодишниот концерт
Скопје, единаесет дена пред Нова година, ќе почувствува музичка магија и празнична еуфорија
во една вечер, во арената „Борис Трајковски“. Во организација на „Прагма продукција“, на 20 декември, маестро Симон Трпчески и пријателите, ќе приредат новогодишен концерт насловен како „Новогодишна музичка идила со Симон и пријателите“ – и ќе нè водат низ светот на најубавите музички класици.
Во првиот дел од концертот е свита од балетот „Оревокршачка“ на Чајковски со четирирачна изведба на пијано, за која на Трпчески ќе му се придружи пијанистот Шкељзен Бафтијари, негов поранешен студент, активен во образовната дејност. Ќе настапи дел од балетскиот ансамбл на НОБ и балетските првенци Марија Кичевска и Бобан Ковачевски.
Во вториот дел од програмата, која денеска на прес-конференција ја соопшти Трпчески, ќе биде класичен репертоар и изведба на дела од Моцарт, Лехар, Верди, Штраус…, изведени од, како што рече, „цела палета музичари“, меѓу кои ќе бидат и членови на ансамблот на неговиот проект „Македонисимо“. Ќе бидат изведени и избор од класици во поп музиката, како легендите Дин Мартин, Френк Синатра, Нет Кинг Кол…, до помладите Мараја Кери и Мајкл Бубле.
Нивните нумери, рече Трпчески, ќе бидат слушнати во „поинакво руво“, обработени специјално за овој концерт од композиторот Панде Шахов. Ќе настапат и двајца оперски солисти – сопранот Гонца Богоромова-Краповски и баритонот Иван Наумовски кои, рече, ќе дадат поинаква димензија на овие класици.
Симон Трпчески и денес, на пресот во Скопје, по концертот во Солун, на свеченото отварање на Метрото, и пред концертите во Ливерпул и во Загреб, вели дека секогаш кога настапува на сцените низ светот дава сѐ од себе, но потенцира дека емоцијата е посилна кога се свири дома.
– Мило ми е што со овој концерт на поврзување на класиката и на поп композиции, ќе ја добилижиме уште повеќе публиката, а пред се децата… Ова го гледам како еден вид предизвик зашто е прв новогодишен концерт целно направен во Македонија. Имав одамна желба да направам нешто вакво. Она што мене ми импонира е дека на овој концерт македонските музичари ќе имаат можност да се претстават на врвно уметничко ниво, истакна Трпчески на прес-конференцијата.
Трпчески настапува во концертни сали и ретко во простор како што е арената „Борис Трајковски“. Последен пат, рече, настапил во арената во Вилнус по успехот на македонската кошаркарска репрезентација.
– Од тој аспект, мислам дека „Прагма продукција“ е прилично искусна и техничкиот аспект ќе биде дополнителна мотивација сето тоа да изгледа како што доликува на нивото – и на нивното, и на моето работење. Не е лесно, меѓутоа ние ќе се потрудиме сето тоа да изгледа како што треба и целата аудиовизуелна перцепција на публиката да биде позитивна, рече Трпчески.
Претставникот на продукцијата рече дека организирањето концерт со ваков концепт и формат во спортска сала е предизвик, но дека имаат опрема и инженери специјалисти за озвучување и за приспособување на салата за ваков вид настани.
-Звукот ќе биде совршен и нема да имате замерки. Во тоа сум сигурен зашто веќе имаме претходно искуство. Во „Борис Трајковски“ успешно настапи мултинационалниот вокален квартет „Ил Диво“, а во март сме подготвени за светскиот тенор Пласидо Доминго, кажа денес, на пресот Стефановски.
Трпчески, овој период има концерти и во Белград и Будимпешта, а му претстојат турнеи во Германија и Швајцарија. Во четвртокот, беше солист и на концертот на Филхармонијата за 80 години од нејзиното постоење.