Сиљановска: Изјавата на Радев не ми беше упатена мене

Претседателката Гордана Сиљановска–Давкова денеска од Тирана не ја коментираше вчерашната изјава на бугарскиот претседател Румен Радев во однос на ветото и преговарачката рамка, но нагласи дека тоа не значи дека се согласува. Јас, нагласи таа, тоа го истакнав во текот на разговорот.

„Апсолутно репликата, ако така може да се каже, не ми е упатена мене, туку е реплика на она што го прави и мора да го прави ЕУ за да покаже дека во моментов нема поважна политика од политиката на проширувањето и оти таа е неразделна од заедничката надворешна и безбедносна политика, а ние многупати сме посочени како држава што е целосно усогласена со Европската надворешна и безбедносна политика“, изјави денеска претседателката.

Едно е какво е личното државно доживување, истакна Сиљановска, а друго е каква е реалноста. 

„Јас тврдев, тврдам и знам дека сите европски политичари се свесни дека тажната неевропска македонска приказна нема да застане на нас, ќе биде една од следните приказни и покрај моето радување за напредувањето на некои држави во регионот“, рече таа.

Претседателката на Македонија повтори дека ние не смееме да бидеме жртва на идентитетските прашања. 

Идентитетските прашања, рече таа, се надвор од која било преговарачка рамка бидејќи се надвор од Договорот за ЕУ од Лисабонскиот договор и од Повелбата за фундаментални права. Таму се гарантира националниот и културниот идентитет, не само на членките на ЕУ, туку и на кандидатите на ЕУ.

„Ние не бараме никаков ексклузивен статус. Ние бараме стандардно однесување. Сакам да живеам во стандардна европска држава, не сакам да биде мојата држава исклучок од сите други, правилата треба да важат за сите, изјави во Тирана Сиљановска–Давкова, која вчера учествуваше на Самитот на шефови на држави и влади на земјите од ПСЈИЕ.

По средбата со претставници на Македонското национално малцинство во Албанија, на Македонската алијанса за европска интеграција, на Македонското друштво „Илинден“ – Тирана, како и со македонски дипломати и професори, таа денеска потсети дека ЕУ побара од неколку европски тинк – тенкови, меѓу кои и „Елијамеп“  од Грција да изработи анализа и да предложи решение за надминување на опасноста од билатерализацијата, односно за употреба и злоупотреба на ветото во процесот на проширувањето бидејќи, како што истакна, денес проширувањето не е само европска демократска потреба, туку е насушна потреба за стабилизацијата и безбедноста на регионот. 

Сиљановска во Тирана се сретна со Марјана Костофски – Фелах, член на Комитетот за национални малцинства при Владата на Албанија, Ендрит Фатаху, потпретседател на единствената партија на Македонците во Албанија, Македонска алијанса за европска интеграција, Незир Муча, потпретседател на Македонското друштво „Илинден“ и Славица Свидерска, професрока по македонски јазик на Лекторатот по македонски јазик на Факултетот за странски јазици при Универзитетот во Тирана.

Она што е најважно во моментот, нагласи Сиљановска – Давкова, е донесената одлука за утрдување на критериумите, документацијата и постапките за собирање на податоци за идентификација на лица кои припаѓаат на националните малцинства во Албанија.

Таа изјави: „Навистина е шокантно луѓе кои со векови се декларирале на овие простори како Македонци и во добро и во зло, сега да ја сменат определбата под притисок на економските потреби“.