Шведскиот премиер се попрaва – ќе ги исполниме барањата на Турција

Неодамнешните коментари на шведскиот премиер Улф Кристерсон за невозможноста на неговата земја да ги исполни барањата на Турција во врска со членството во НАТО се „недоразбирање“, појасни тој во средата.

Кристерсон минатата недела рече дека Турција – која допрва треба да ја ратификува кандидатурата на Шведска за влез во НАТО – „сака работи што не можеме и не сакаме да им ги дадеме“.

Но, зборувајќи за новинарите во Стокхолм, премиерот рече дека Шведска се придвижила кон зајакнување на законодавството за борба против тероризмот – клучно барање на Турција која сака поединци да бидат екстрадирани од Шведска. Дискусиите „одат многу добро“, рече тој.

„Го правиме токму она што ветивме дека ќе го направиме, тоа не е само на полето на борбата против тероризмот“, им рече Кристерсон на новинарите во Стокхолм. „Мислам дека тоа беше една од суштинските задачи – да се зајакне шведското законодавство за борба против тероризмот, да се препознае фактот дека активностите на шведско тло може да бидат опасни за другите земји, може да бидат насочени кон други земји, а исто така да се признае фактот дека Турција е една од земјите најповредена од тероризмот“.

Но, тој исто така предупреди на ограничувањата на она што Шведска може да го направи кога станува збор за екстрадиција на поединци во Турција.

„Турција понекогаш именува луѓе кои би сакале да ги екстрадира од Шведска и добро е познато дека шведското законодавство за тоа… е многу јасно: дека судовите [донесуваат] тие одлуки, нема простор за промена на тоа“, рече тој. „Мислам дека тоа не треба да го засенчи фактот дека работите одат добро“.

Шведскиот суд минатиот месец ја блокираше екстрадицијата на Булент Кенеш, турски новинар во егзил, кој беше идентификуван од турскиот претседател Реџеп Таип Ердоган како поединец што Шведска мораше да го екстрадира во замена за зелено светло за НАТО од Анкара.

Во забележителна промена на тонот од коментарите што ги даде на 8 јануари на шведската конференција за безбедност и одбрана, Кристерсон рече дека ги почитува и домашните грижи на секоја членка на НАТО кога станува збор за проширување на алијансата.

„Имаме целосна почит кон фактот дека Турција, како и секоја друга од 30-те земји на НАТО, ги донесуваат своите домашни одлуки дали да ратификуваат или не. Но, тој додаде дека Шведска има „многу силна поддршка од земјите“.

Шведска и Финска се подготвени да станат најновите членки на НАТО, откако алијансата ја поддржа нивната кандидатура за членство на самитот во јуни минатата година во Мадрид. (Политико)