Шведскиот премиер го осуди лидерот на крајната десница кој побара да се урнат џамиите

Шведскиот премиер Улф Кристерсон го осуди лидерот на екстремно десничарските Шведски демократи Јими Акесон затоа што изјави дека џамиите треба да се урнат, нарекувајќи ја изјавата „непочитување“.

„Во Шведска, ние не ги уриваме местата за богослужба“, рече Кристерсон во понеделникот, објави шведскиот медиум СВТ.

Акесон се најде на удар на критиките во саботата затоа што рече дека Шведска треба да го забрани формирањето на нови џамии, а сугерираше дека треба да ги уништи и постојните во земјата.

„Исто така, треба да започнеме со конфискување и уривање на зградите на џамиите каде што се шири антидемократска, антишведска, хомофобна, антисемитска пропаганда или општа дезинформација за шведското општество“, рече тој за време на говорот.

Иако не се официјален дел од владејачката коалиција, Шведските демократи нудат клучна поддршка за владата, која ги вклучува малцинските партии од десниот центар, Умерените, либералите и демохристијаните.

Коментарот на Акесон наиде на реакции од целата шведска политичка сцена, вклучително и од поранешната премиерка и лидер на социјалдемократите Магдалена Андерсон, која предупреди дека изјавата на Акесон „го влошува имиџот на Шведска, не ја олеснува нашата апликација во НАТО и дополнително ја зголемува поларизацијата во нашата земја“.

Во понеделникот, Кристерсон изјави за СВТ дека зборовите на Акесон даваат „неточна слика за она за што Шведска се залага на меѓународно ниво“.