Шведска: Победникот на изборите, социјалдемократите – не успеа да формира влада

Андреас Норлен од централно-десничарската партија Умерени беше реизбран за претседател на шведскиот парламент со поддршка од Левата партија, победувајќи ја социјалдемократката Јохана Харалдсон со 200 наспроти 146 гласа. Харалдсон станува прв потпретседател на парламентот.

Претходно, лидерката на социјалдемократите, Магдалена Андерсон, се откажа од обидот да формира влада, наведувајќи ја како причина поддршката што Левата партија му ја даде на Норлен. Тој сега ќе одлучи кој партиски лидер ќе ја добие следната можност за формирање влада. Лидерката на шведската Социјалдемократска партија (левиот центар), Магдалена Андерсон, во понеделникот изјави дека нејзините разговори со другите партии за формирање влада по тесната изборна победа на нејзиниот блок завршиле неуспешно.

Овој неуспех ја остава Шведска без нова влада повеќе од две недели по изборите и отвора можност за блокот на десницата, кој е на заминување, да се обиде да остане на власт и покрај поразот на гласањето.

Андерсон се обидуваше да ги обедини социјалдемократите, зелените, Партијата на центарот и Левата партија, кои заедно освоија 176 од вкупно 349 пратенички места во парламентот.

Сепак, разговорите заглавија поради длабоките поделби меѓу Партија на центарот и социјалистичката Лева партија.

„Врз основа на разговорите што ги водев, можам да заклучам дека, во моменталната ситуација, за мене не е можно да формирам влада“, им изјави Андерсон на новинарите.

Коалицијата од четири партии освои 176 места на изборите одржани на 13 септември, наспроти 173-те места на десничарскиот сојуз што е на заминување. Разликата во бројот на гласови изнесуваше околу 50.000.

Се очекува претседателот на парламентот сега да побара од друг партиски лидер да се обиде да формира влада, при што веројатен следен избор е актуелниот премиер Улф Кристерсон од Умерената партија.

Кристерсон продолжува да ја предводи преодната влада. Неговиот блок, во кој влегуваат и екстремно десничарските Шведски демократи, исто така не успеа да обезбеди мнозинство и веројатно ќе има потреба од поддршка од Партијата на центарот.

Лидерката на Партијата на центарот, Елизабет Танд Рингквист, ја отфрли можноста за поддршка на влада што би им дала влијание на Шведските демократи или на Левата партија.