Швајцарците на референдум изгласаа воведување 13-та пензија

Швајцарците во неделата на референдум се изјаснија за воведување на 13-та пензија, според првите проекции на јавната телевизија СРФ.

Анкетата на СРФ покажа дека за дополнителна пензија гласале 58 отсто од гласачите, а против биле 42 отсто.

Мерката беше предложена од Швајцарската федерација на синдикати и партиите од левиот центар, а сега е потребна поддршка од мнозинството од 26-те швајцарски кантони за да биде усвоена.

„Овој чекор е навистина голема пресвртница од перспектива на синдикатот“, рече Лукас Голдер од анкетната компанија гфс.берн.

Владата, трговските лобија и тековно десничарскиот парламент го отфрлија предлогот, тврдејќи дека е финансиски неодржлив.

Швајцарските гласачи претходно беа претпазливи за мерките за поддршка кои се сметаат за ризични за економијата.

Гласањето за 13-тата пензија е во спротивност со другите референдуми во изминатите децении на кои Швајцарците решително отфрлија скратување на работната недела или продолжување на годишните одмори.

Загриженоста поради зголемените трошоци за живот владее со алпската земја. Цирих, најголемиот град во Швајцарија, ја дели титулата најскап град во светот со Сингапур, според истражувањето објавено во ноември од Економист Интелиџенс Јунит.

Мери, 65-годишна жителка на Цирих, смета дека има смисла воведувањето на 13-та пензија.

„Сега сум во пензија, па очигледно сакам повеќе“, рече таа.

„Тоа би ми овозможило да им дадам малку повеќе на моите внуци“, додаде таа.

Се уште не се знае како ќе се финансира покачувањето на пензиите кое би стапило во сила во 2026 година.

Швајцарците во неделата гласаа и за постепено зголемување на старосната граница за пензионирање, од 65 на 66 години, но тоа беше отфрлено на гласачките места.