Што е хантавирус од кој починаа тројца патници на крузер
Три лица починаа, а тројца други се разболеа по пријавена епидемија на хантавирус, вирус што се пренесува преку глодари и може да предизвика фатална респираторна болест, на холандски крстосувач, објави Ројтерс, повикувајќи се на владини изјави и медиумски извештаи во неделата.
Холандската туристичка компанија Oceanwide Expeditions во соопштението изјави дека „управува со сериозна медицинска ситуација“ на поларниот експедициски брод MV Hondius, кој се наоѓа покрај брегот на Зелениот Остров, островска нација во Атлантскиот Океан западно од африканскиот континент.
Појава на вирусот
Крстосувачот исплови од Аргентина пред околу три недели со околу 150 патници и застана на Антарктикот и на други локации на пат кон Зелениот Остров, според медиумските извештаи.
Портпаролот на холандското Министерство за надворешни работи потврди дека двајца холандски патници се починати, без да даде дополнителни детали.
Светската здравствена организација (СЗО) во објава на X изјави дека еден од болните патници е на одделот за интензивна нега во Јужна Африка. Скај њуз објави дека патникот бил британски државјанин, повикувајќи се на соопштение од Министерството за здравство на Јужна Африка.
СЗО објави дека истражува епидемија на вирусот. Лабораториските тестови потврдија дека едно од шест болни лица е заразено со хантавирус, објави агенцијата.
Компанијата Oceanwide Expeditions објави дека властите на Капо Верде не им дозволиле на патниците на кои им е потребна медицинска помош да се истоварат и дека холандските власти се обидуваат да организираат репатријација на двајца патници со симптоми на болест и телото на еден од починатите патници.
Што е хантавирус?
Хантавирусот се шири кога честички од урина и измет од глодари го контаминираат воздухот, на пример, по чистење на области каде што имало глувци. СЗО забележува дека вирусот се шири преку контакт меѓу луѓето само во ретки случаи.
Болеста започнува со симптоми слични на грип што можат да доведат до срцева и белодробна инсуфициенција, при што околу 40 проценти од случаите завршуваат со смрт, забележа Ројтерс, повикувајќи се на податоци од американскиот Центар за контрола и превенција на болести.
Нема специфични лекови за хантавирус, па затоа терапијата е фокусирана на поддржувачка нега, вклучително и вентилатори во тешки случаи.
„СЗО помага во координацијата меѓу земјите-членки и операторите на бродови во медицинската евакуација на двајцата патници кои имаат симптоми (на болест), како и во проценката на ризиците по јавното здравје и поддршката за преостанатите патници на бродот“, соопшти СЗО.
Британското Министерство за надворешни работи и Министерството за здравство на Јужна Африка не одговорија веднаш на барањето на Ројтерс за коментар за ситуацијата.