Шпанското село Салто де Кастро се продава за 260.000 евра

Селото Салто де Кастро, кое се наоѓа на северозападот на Шпанија, се нуди на продажба по цена од 260 илјади евра.

Селото се наоѓа на границата со Португалија во провинцијата Замора, а од Мадрид е оддалечено 3 часа возење. Селото има многу градби кои вообичаено може да се најдат во мал шпански град, има 44 домови, хотел, црква, училиште, градски базен, па дури и бараки кои биле користени за сместување на цивилната стража.

Сепак, селото нема жители бидејќи било напуштено пред повеќе од три децении. Сегашниот сопственик го купил на почетокот на 2000-тите со намера да го претвори во туристичка локација, но неговиот план бил спречен поради кризата во еврозоната.

„Сопственикот имаше сон да поседува хотел, но сѐ е запрено. Неговата желба е таков проект да се оствари во иднина“, изјави Рони Родригес од компанијата Royal Invest, која го застапува сегашниот сопственик.

„Го продавам селото бидејќи живеам во град и не можам да го одржувам“, вели сопственикот кој има над 80 години.

Огласот привлече голем интерес и забележа повеќе од 50.000 посети за само неколку дена, а околу 300 луѓе директно ја покажале својата желба за купување. Барања доаѓаат од Русија, Франција, Белгија и Обединетото Кралство, а едрн од заинтересираните веќе дал аванс за купувањето.

Селото Салто де Кастро е изградено од компанијата Ибердуро, која се занимава со производство на електрична енергија, а во него требало да бидат сместени семејствата на работниците кои работеле во близина на акумулацијата во почетокот на 50-тите години на минатиот век. Но, по завршувањето на проектот, семејствата се иселиле, па селото било целосно напуштено кон крајот на 80-тите.

И претходно селото беше понудено на продажба, но по цена од 6,5 милиони евра, па никој не се огласи. Со текот на времето беше вандализирано, па бараната сума сега е драстично помала. Денеска се продава за 260.000 евра.

На идниот сопственик ќе му требаат повеќе пари за уредување на селото и привлекување посетители, а се проценува дека е потребна инвестиција од околу 2 милиона евра за да биде 100% функционално и исплатливо.