Шпанската полиција почна операција за отстранување на мигрантите од плажите на Сеута

Сеута – Шпанската полиција за разбивање демонстрации денеска лансира гумени куршуми во воздух и тепаше луѓе со палки во операција за чистење на плажите во шпанската северноафриканска енклава Сеута од илјадниците мигранти и нивно преместување во привремено сместување.

Операцијата за отстранување на мигрантите од плажите почна утрово непосредно пред 7 часот по локално време, а во неа учествуваа и полицијата за разбивање на демонстрациите и шпанската армија, објавија британските медиуми.

Мигрантите, кои ја поминале ноќта чекајќи на плажата со надеж дека ќе добијат место во привремено засолниште, првично аплаудираа кога конвојот се движеше, но подоцна имаше врева и туркање додека се бореа за ограничениот број достапни места.

Снимките од државниот радиодифузер TVE покажуваат толпи и турканици додека луѓето се обидуваа да влезат по предвидената траса за движење.

Полицијата лансира гумени куршуми во воздух и погоди неколку мигранти со палки пред ситуацијата да се смири и операцијата да продолжи.

Подоцнежните снимки покажуваат претежно возрасни мажи како ги носат своите работи и одат во мали групи под полициска придружба по патека долга нешто повеќе од еден километар од плажата Ел Трамполин до пристаништето.

Повеќето од мигрантите се мажи и момчиња.

Привремените сместувачки капацитети се изградени исклучиво за возрасни мажи, па малолетниците се одвоени и сместени на посебни локации.

Претставници на три невладини организации изјавија за „Ројтерс“ дека властите биле премногу бавни во обезбедувањето минимален сместувачки капацитет за мигрантите, што е обврска според Европскиот пакт за миграција, и дека прифатните центри отворени досега не може да ги сместат сите оние што сè уште спијат на улиците.

Една невладина организација процени дека речиси 4.000 мигранти сè уште живеат на отворено, на плажите и на тротоарите на Сеута.

Шпанија проценува дека 10.000 мигранти сè уште живеат на оваа мала територија.

Повеќе од 72.000 луѓе влегоа во енклавата од Мароко кон крајот на јули во невиден пораст иако повеќето оттогаш заминаа.

Властите изградија нов привремен сместувачки капацитет во пристаништето на енклавата, со капацитет за 1.700 луѓе.

Невладините организации известуваат дека илјадници луѓе сè уште немаат сместување и спијат на отворено, во кампови.