Шефот на тајната служба Шин Бет ја презеде одговорноста за нападот на Хамас

Шефот на израелската безбедносна агенција Шин Бет вели дека тој е лично одговорен за немањето рано предупредување за убиствениот напад на Хамас врз јужен Израел на 7 октомври.

Во писмотодо членовите на агенцијата, Ронен Бар пишува: „И покрај низата дејства што ги извршивме, за жал во саботата не можевме да генерираме доволно предупредување што би овозможило да се спречи нападот“.

„Како оној што ја предводи организацијата, одговорноста за ова е моја“, вели Бар. „Ќе има време за истраги. Сега се бориме“.

Неколку часа пред нападот на 7 октомври, одбранбениот естаблишмент идентификуваше невообичаено движење во Појасот Газа, што доведе до телефонски повик меѓу високи функционери доцна во ноќта, но знаците беа главно отфрлени.

Сепак, според извештаите на медиумите на хебрејски јазик, Бар отишол во седиштето на агенцијата и наредил мал тим да биде распореден на границата со Газа, очекувајќи напад од мал обем.

Најмалку 10 членови на Шин Бет беа убиени за време на нападите на 7 октомври, според агенцијата.

„Ние сме во војна, а не во пресметка. Војната завршува со одлучувачка победа и промена на ситуацијата. Нема граница, нема временско ограничување. До самиот крај“, додава Бар.