Северна Кореја ја претстави првата „тактичка нуклеарна подморница“

Северна Кореја ја лансираше својата прва „тактичка нуклеарна подморница“, која ќе биде дел од флотата што патролира во водите меѓу Корејски Полуостров и Јапонија, објавија севернокорејски државни медиуми.

Севернокорејскиот лидер Ким Џонг-ун, кој присуствуваше на лансирањето, истакна дека итна задача е да се вооружи морнарицата со нуклеарно оружје и вети дека ќе распореди повеќе подморници и бродови опремени со тактичко нуклеарно оружје на морнарицата.

Ким најави дека Северна Кореја планира да ги претвори своите постоечки подморници во нападни подморници вооружени со нуклеарно оружје и да го забрза процесот што треба да доведе до изградба на подморница на нуклеарен погон.

Засега не е познато со какви проектили ќе биде вооружена новата подморница. Северна Кореја тестираше голем број балистички ракети лансирани од подморници (СЛБМ) и крстосувачки ракети лансирани од подморница. Исто така, не е јасно дали Северна Кореја целосно ги развила намалените нуклеарни боеви глави потребни за монтирање на такви ракети.