„Селфи“ посмртоносно од напад на ајкула

Бројот на смртни случаи предизвикани од фотографирање селфи го надмина бројот на фатални напади на ајкула, покажува најновата студија објавена во списанието Travel Medicine.

Во последните 13 години имало 379 смртни случаи поврзани со селфи фотографии, од кои 140 биле туристи, додека забележани се 90 фатални средби со ајкули, пишува Euro Weekly News.

Во просек, жртвите биле на возраст од 24,4 години, а најголем број на такви смртни случаи имаат Индија, САД и Русија. Луѓето, наводно, ги ризикуваат своите животи за совршено селфи, што доведува до фатални падови од карпи, несреќи со возила и возови, опасни средби со дивиот свет и давење.

Властите преземаат мерки, наметнуваат казни, па дури и затворски казни за несовесно однесување поврзано со селфи, а забраните за селфи стануваат се почести во туристичките места, па Портофино, Италија воведе привремена забрана за селфи за да ги спречи туристите да го нарушуваат сообраќајот додека фотографираат.

Желбата за внимание и валидација на социјалните медиуми често предизвикува непромислено однесување, предизвикувајќи луѓето да ги игнорираат безбедносните предупредувања или да се впуштат во опасни области. Како пример, порталот наведува гондола со туристи во Венеција, која за малку ќе се превртела бидејќи туристите биле премногу фокусирани на правење селфи наместо да слушаат безбедносни предупредувања. Се додава дека за среќа во тој инцидент немало повредени, но можело да заврши трагично.

Студијата покажала и дека во претходните фатални случаи почесто страдаат жените со паѓање или средба со животни, додека мажите најмногу гинеле во сообраќајни несреќи.