Села уште не преговарал за влада

Алијанса и Алтернатива се уште формално не преговараат за влез во новата Влада, бидејќи се уште нема мандатар. Лидерот на Алијанса вели дека ќе почекаат прво ДУИ да си искористи сите шанси, па дури потоа ќе настапат со своите барања. Според Зијадин Села, ако не се прифати ветувањето на ДУИ за премиер-Албанец Али Ахмети треба да замине во опозиција. Дури и информациите за ротирачки премиер во кои ДУИ би добиле една година премиерско место е пораз за Ахмети.

За да дадат поддршка на новата Влада, Алијанса и Алтернатива ќе ги постават барањата кои беа дел од нивната програма. Решавање на проблемот на 70 000 граѓани кои немаат државјанство, додавање етничка димензија на Законот за правична застапеност, полова еднаквост на цела администрација, но и официјализирање на албанскиот јазик во Уставот.

Во меѓувреме владејачката и опозициската партија се скараа и за изградбата на системот за снабдување со вода во тетовско Синичане. Села го обвини министерот за внатрешни Агим Нухиу дека со своите наредби ги штити бизнис интересите на неговите сопартијци од редовите на ДУИ кои наместо вода за пиење сакаат да изградат хидроцентрали, додека од МВР одговорија дека полицијата е на терен по барање на јавното обивнителство Тетово заради обезбеднување на јавниот ред и мир.

Преговорите за нова Влада се очекува да се засилат по конститутивната седница која Џафери ја закажа во вторник на пладне. До 15 август шефот на државата Пендаровски ќе треба да го предаде мандатот за состав на новиот владин кабинет.