СДСМ: ВМРО-ДПМНЕ се врати на местото на злосторството
Владејачката СДСМ ги оцени денешните протести за ослободување на осудените за настаните од 27 април како „враќање на ВМРО-ДПМНЕ на местото на злосторството“.
„Старо ВМРО-ДПМНЕ, стара песна остатоци од мрачното минато денеска излегоа на улица, го славеа насилството и режимот со истата хушкачка реторика, со истата насилничка кореографија од пред четири години и со прекршување на протоколите за заштита од ковид 19.
Христијан Мицкоски, Јанко Бачев, Димитар Апасиев, инсталациите на Никола Груевски денеска застанаа зад насилството, зад осудените лица кои упаднаа во Собрането на 27 за да спречат транзиција на власта и да ја погазат волјата на народот.
На 27 април 2017 на крвавиот четврток, вооружени насилници упаднаа во Собранието и се обидоа да убијат пратеници, новинари и вработени во собраниските служби, тоа го виде целата домашна и меѓународна јавност.
Крвави глави, тепани пратениците, под закана новинари, претепани пратеници кои завршија во кома, тоа се нечовечки дела на насилници. Насилници не се уставобранители и никогаш нема да бидат.
Денеска, Мицкоски кој и самиот беше дел од толпата пред Собранието на крвавиот четврток, застана токму зад овие осудени насилници, застана на браникот на криминалот и насилството“, рече портпаролката на партијата Богданка Кузеска.
Според СДСМ, Мицкоски ги реализирал нарачките од неговиот ментор во Будимпешта, Никола Груевски и во тоа бил поддржан од Апасив и Бачев.