СДСМ вели дека Мицкоски ги поткопал позициите на Македонија на конгресот на ЕПП
Владејачката СДСМ уште еднаш ги обвини ВМРО-ДПМНЕ и Христијан Мицкоски дека се согласиле на конгресот на Европската народна партија (ЕПП) во Ротердам во резолуцијата за Македонија да натежнат бугарските ставови.
„Поткопани се државните позиции на Република Северна Македонија од страна на Христијан Мицкоски. На конгрес на Европската народна партија, каде што учествувал и Христијан Мицкоски, усвена е Резолуција која во еден дел го поткрепува ставот на Бугарија.
Иако повикува на почеток на преговори во Резолуцијата е тврдењето дека не сме ги почнале преговорите со ЕУ затоа што не биле ‘постигнати опипливи резултати во однос на спроведувањето на билатералните договори со Бугарија“, изјави Дарко Каевски, портпарол и пратеник на СДСМ.
Тој прашува дали Мицкоски реагирал кога се усвојувал ваков документ на конгресот. „Ако не реагирал, значи се согласува со напишаното. Прашање е дали гласал Мицкоски за резолуција на ЕПП со ставови на Бугарија?“
Понатаму СДСМ го обвинува Мицкоски дека ги поткопувал државните позиции во клучни моменти.
„Додека дома блокира се што е во интерес на граѓаните, Христијан Мицкоски надвор ги поткопува државните позиции. Го повикуваме лажниот патриот Христијан Мицкоски да излезе пред граѓаните и да одговори зошто ова и го прави на сопствената земја, на сопствениот народ?
За оолку важно прашње, ваков недржавнички чекор презема само очаен човек. Ова е срамен, неодговорен однос на Мицкоски кон сопствената држава и наместо да молчи треба да излезе пред граѓаните и да објасни зошто“, рече портпаролот Каевски.