СДСМ повикува на одговорност, ВМРО-ДПМНЕ плаши со ломбардиско сценарио

Во време кога есенскиот бран на пандемијата со коронавирусот е во полн налет, бројот на инфицирани расте, болничките капацитети се полнат, а здравствените работници се преморени, важно е сите да покажеме одговорност за сопственото и за јавното здравје, порачаа денес од владеечката СДСМ.

-Парламентарното мнозинство предводено од СДСМ и покрај обидите за опструкции од ВМРО-ДПМНЕ, ги донесе измените на Законот за заштита на населението од заразни болести.Со овие измени стапуваат на сила новите мерки, коишто се имплементирани во цела Европа и  гарантираат повисок степен на заштита и намалување на ширењето на коронавирусот.Покрај носење заштитна маска во затворени простори каде што може да се соберат повеќе лица во исто време, во државни институции и приватни деловни објекти, сега е задолжително носење заштитна маска и на отворен простор.

Носењето маска не е потребно при возење во приватно патничко возило, ако возачот е сам или со лице со кое живее во заедница, при престојување во двор во семејна куќа со лица од исто семејство, или во угостителски објект каде се применуваат специфичните протоколи за заштита.Групирање на повеќе од четири лица на јавен простор по 22 часот е забрането, а угостителските објекти затвораат во 23 часот.

Исто така, преполовен е капацитетот на патници во јавниот превоз и важи препораката, ако е можно да се работи од дома, онлајн.Инспекциските служби имаат поголеми ингеренции, а непочитувањето на мерките се казнува.Самоизолација од моментот на закажување на тестот до добивање на резултатот е задолжителна, а во случај тестот да биде позитивен на вирусот ковид-19, лицето останува во изолација.

Со новите мерки е уреден и начинот на лекување на лица заболени од ковид во приватни установи. Интернисти од приватното здравство се спремни да учествуваат во работата во клиниките и болниците не само во Скопје туку и низ државата.И покрај сериозноста на ситуацијата, состојбата е под контрола и никој нема да остане без здравствена нега.Сега е неопходно сите граѓани доследно да ги почитуваат мерките и задолженијата за заштита од коронавирусот.Само на тој начин, заедно можеме да ја намалиме трансмисијата на вирусот и да го заштитиме јавното здравје, соопштија од СДСМ.

-Македонија со Заев и Филипче оди кон ломбардиско сценарио. Нов ден, нови црни бројки од корона епидемијата. Во последното деноноќие регистрирани се 862 новозаболени и 14 нови починати, а бројот на активни случаи се искачи на околу 8.500 лица. Ова дека подготвени ќе го дочекаат вториот есенски бран, а гледаме дека болничките капацитети се исполнети, граѓаните чекаат со денови да бидат тестирани, здравствениот персонал  е исцрпен и демотивиран од властите, речиси целиот здравствен систем ни е во хаос поради лошото менаџирање со состојбите, а нивните мерки се сведуваат на ред апели, ред читање на црни статистики, ред обвинување на граѓаните, опозицијата и слично.

Сите им се виновни што не знаат да се справат со епидемијата, освен самите тие. За еден месец во Македонија има над 11 илјади нови случаи на заболени и околу 250 починати. Со вакви бројки Македонија е редовно на врвот по црната статистика, а здравствените власти не чувствуваа одговорност. Сето тоа покажува колку мафијата на власт се грижи за здравјето и животите на граѓаните, колку и какви мерки превземаат епидемијата да се контролира и здравствениот систем да се менаџира, порачуваат од ВМРО-ДПМНЕ.