СДСМ: Не запираат скандалозните назначувања на Мицкоски – ќе имаме Монти пајтон влада

Не запираат скандалозните назначувања на неквалификувани и осудени кадри на Мицкоски и ВМРО-ДПМНЕ. Како што тргнале ќе имаме автентична македонска Монти пајтон Влада која ќе биде за потсмев, тврдат од опозициската СДСМ. 

– Најновите кадровски решенија за кои граѓаните се во шок, се новиот директорот на Клиниката за урологија Башким Шабани и главниот ревизор на Ревизијата на претпристапната помош, Афрона Вервизоли – се вели во партиското соопштение. 

Појаснуваат дека Шабани има судска пресуда од 2020 година со која е виновен дека во 2019 претепал колега, удирајќи го по главата и по телото. Насилници и бивши осудени лица се очигледно главни кандидати за функционери и директори, додаваат од партијата. 

Второто кадровско решение, Афрона Вервизоли, кое веќе го истражува Делегацијата на ЕУ во Македонија е целосно потценување на позицијата. Со владина одлука, од минатата недела на таа позиција е назначена Афрона Вервизоли која според медиумите нема соодветни квалификации за таа позиција. Според достапните информации, Вервизоли работела на шалтер во банка, а сега ќе треба да биде главен ревизор на претпристапната помош во ЕУ. 

Кои се причините за ваквите назначувања треба да каже премиерот Мискоски, повикуваат од СДСМ.

Потсетуваат дека претходно професор по физичкo и доктор по Кинезологија стана заменик-министер во МВР, во Министерството за одбрана има економистка со искуство во маркетинг областа, а заменичка-министерка во Министерството за спорт на Мицкоски пак ќе му биде дипломирана информатичарка, Сејфие Садик.