СДСМ им подели примероци од договорот за Фронтекс на пратениците од ВМРО-ДПМНЕ и Левица

 

Пратениците од СДСМ на денешната седница за пратенички прашања им поделија печатени примероци од договорот со ЕУ за Фронтекс, на пратниците од ВМРО-ДПМНЕ и Левица, потпишан на македонски јазик и без додавки и побараа да им се извинат на граѓаните и пратениците.

„Јас мислев дека се јавивте за повикот да им се извините и на граѓаните и на пратениците за сите лаги кои ги пласиравте, посебно за преговарачката рамка.  Еве ги заклучоците кои ги гласаше ова Собрание, односно парламентарно мнозинство на СДСМ а од кои ВМРО-ДПМНЕ избега, свиреше и врескаше. Во овие заклучоци е и овој Договор за Фронтекс, потпишан од Владата на чист македонски јазик, без додавки, без придавки, без фусности, на официјален македонски јазик.

Бидејќи вистината е најсилниот лек против лагата, денеска на сите пратеници од ВМРО-ДПМНЕ ќе им поделиме по еден примерок од договорот со Фронтекс на македонски јазик. Рамноправен македонски јазик со сите 24 јазици на ЕУ. Нека прочитаат и нека видат, како гордо звучи македонски јазик во ЕУ. Да видат дека со лаги и манипулации не се води политика.  Станавме дел од НАТО како Македонци со македонски јазик, како Македонци со македонски јазик ќе станеме и дел од ЕУ“, рече  координаторот на пратеничката група на СДСМ, Јован Митрески.