СДСМ го повика ВМРО-ДПМНЕ да ги достави информациите за таен имот на ДКСК
Од опозицијата тврдат дека 123 функционери од редовите на СДСМ и ДУИ не пополниле целосни анкетни листови со што сокриле имот од 30 милиони евра.Од СДСМ велат дека ВМРО-ДППМНЕ се тие што краделе граѓани и трупале имот, потсетувајќи на судската пресуда за Талир 2, која се однесува на незаконски стекнатата бела зграда што е седиште на партијата, но и на имотите на поранешниот премиер кој избега во Будимпешта, Никола Груевски.
„Кога зборува за имоти, ВМРО-ДПМНЕ прво нека си погледне во своите редови и својот дворец“, велат од СДСМ.
За опозицијата ДКСК, односно Антикорупциската комисија е дел од проблемот, бидејќи сметаат дека не реагира.
„И самата претседателка на Антикорупциска во повеќе наврати призна дека постојат функционери кои имаат имот што не е на нивно име. И пос половина година за тоа реакција нема“, велат од ВМРО ДПМНЕ.
Тие дадоа рок од 24 часа за институциите да реагираат. Во спротивно велат дека ќе ги објавуваат имињата и имотите на оние за кои утврдиле дека се дел до аферата.
„Ако ВМРО-ДПМНЕ имаат информации нека поднесат пријави до Државната комисија за спречување корупција (ДКСК) и ние ќе постапиме“, порача претседателката на Антикорупциска, Билјана Ивановска, во разговор за „360 степени“.
„Ќе видиме за што станува збор. Надлежноста на ДКСК е да изврши проверка на анкетните листови, дали тие ги содржат сите податоци кои ги потврдуваме со прибирање и споредба на информации од надлежни институции, како што се Агенцијата за катастар, МВР, УЈП итн. Проверуваме дали тоа што е пријавено соодветствува со тоа што го имаат регистрирано институциите“, вели Ивановска.
Во случајот со аферата за која обвинува ВМРО-ДПМНЕ, објаснува Ивановска, доколку има такви лица, она што може ДКСК да го направи е да изрече глоба доколку функционери имаат имот регистриран во Катастар, а не го пријавиле во анкетниот лист.Но, во случај да имаат имот кој не е заведен на нивно име во Катастар, тогаш тука има проблем.
„Ако имотот не е регистриран во Катастар, тука е проблемот на кој ние постојано укажуваме дека има висок ризик од корупција и три години бараме да се донесе Законот за потекло на имот. Кога секој граѓанин ќе си каже од каде е имот, полесно ќе биде да се утврди состојбата“,вели претседателката на ДКСК.
Покрај законот за потекло имот, од голема помош за Антикорупциска, нагласува таа, ќе биде и ставањето во функција на софтверот кој ќе значи поврзување на сите институции. Со него, пратениците електронски ќе пополнуваат анкетни листови и истите во реално време ќе може да се споредат дали ги содржат сите податоци за нивните имоти или не.