СДСМ бара намалување на ДДВ-то за струја, за прехранбени производи и на цената за Зелен картон
Граѓаните се под огромен финансиски притисок каков што немало изминатите години. Се помалку пари имаат во џебовите, нема нешто што не е поскапено – оцени денес на прес конференција лидерот на СДСМ, Венко Филипче. Според него, Владата очигледно не прави ништо, ниту пак има план и стратегија како да го подобри стандардот на граѓаните.
„Ограничувањето на маржите како единствена мерка нема да даде ефект“, порача Филипче додавајќи дека маржите се задицнети и однапред најавени, така што трговците имаа време да ги качат цените за да ги намалат ефектите. Затоа, тој излезе со седум конкретни предлози.
„ Предлагаме намалување на ДДВ на струја од 18 на 5 проценти, со што на сметки од 3.000 заштедата ќе биде 400 денари. Предлагаме намалување на ДДВ-то на основните прехранбени производи што во комбинација со дополнително замрзнување на маржите и цените може да резултира со намалување на цените до 30 отсто. Предлагаме замрзнување на цените на основните прехранбени производи во следните три месеци, фиксирање на маржите на основните прехранбени производи за да се намали ризикот од манипилирање и под итно да се спроведе Законот за нефер трговски практики. Предлагаме намалување на цената на зелениот картон за автомобилите, што ќе им заштеди на граѓаните и малите бизниси меѓу 9 и 11 милиони евра, како и замрзнувањето на придонесите што ќе овозможи да се зголемат платите, предложи Филипче.
Тој соопшти дека како партија направиле анкета околу цените и дошле до сознание дека откако се најавиле мерките од Владата, дел од маркетите ги зголемиле цените за 10 отсто.
„Ваков финансиски удар врз граѓаните досега немало, а инфлацијата во земјата не е толку висока“, порача Филипче, заклучувајќи дека Владата покажува тотална незаинтересираност да го подобри стандардот на граѓаните.
Филипче оцени исто така дека ни се случува пад на извозот како одраз на глобалните случувања и тоа 8,7 отсто во однос на сите ЕУ земји и драматични 15 отсто во однос на Германија, па побара од владата да подготви план како да се справи со оваа ситуација која според него ќе се влошува.
Денеска, Владата на итна сендица се очекува да ја разгледа Предлог-одлуката подготвена од Министерството за економија за ограничување на маржите. Одлуката е донесена врз основа на извештајот од Државниот пазарен инспекторат кој покажа дека кај трговците на мало имало над 20 отсто маржа на основните прехранбени производи и над 30 отсто маржа кај средствата за лична хигиена, додека кај увозниците дистрибутери се евидентирани повисоки маржи кои одат дури и до 70 отсто.