САС на МПЦ: Сега е време, не за паника, туку за одговорност и кон себеси и кон ближните

Сега е време, не за паника, туку за одговорност и кон себеси и кон ближните, устројувајќи го своето семејство во домашна црква. Во овие великопосни денови, во молитвите особено сме со заболените во инфективните одделенија, со здравствените работници, болничкиот персонал и со сите оние кои саможртвено се борат за надвладување на пандемијата, соопшти Канцеларијата на Светиот архиерејски синод (САС) на Македонската Православна Црква – Охридска Архиепископија (МПЦ-ОА).

САС на МПЦ повторно апелира да се почитуваат мерките кои ги донесе Владата, особено тие што се однесуваат на јавните собири, повиците за самоизолација, како и сите други активни мерки од Министерството за здравство и од центрите за јавно здравје.

Рестриктивните мерки во однос на богослужбениот циклус, како што се посочува, треба да бидат усогласени во духот на овие владини вонредни мерки, а секој епархиски архијереј да ги усогласи соодветно на реалната ситуација во неговата епархија, во духот на совесноста, просветлението, трезвеноумието и сопствената одговорност. Од Канцеларијата на САС на МПЦ-ОА ги повикуваат сите верни чеда на МПЦ-ОА, во татковината и во дијаспората, стриктно да ги запазат мерките за ограничување на заразата, наложени од државните власти.

– Да бидеме внимателни и одговорни! Божјиот благослов да биде со сите нас, стои во соопштението од Канцеларијата на Светиот архиерејски синод на Македонската Православна Црква – Охридска Архиеписка архиепископија.