Сакаш да бидеш некој и нешто? Тогаш… читај и посети го Саемот на книга во Скопје (галерија)
Секоја година Саемот на книгата ја отвара дилемата: Дали во Македонија се читаат книги?
Од една страна, напливот на медиуми и интернет сепак не ја истисна книгата, според експертите има читатели кои освен лесна литература и бестселери, читаат стручна литература. Од друга страна, во Македонија нема развиено култура на читање, која подразбира свест и потреба за подигање на нивото на сопствените знаења, како и желба за развој на сопственото духовно живеење на поединците. Па, малкумина го сметаат читањето за осмислен забавен начин на поминување на слободното време. Но, во истовреме меѓу помладата генерација е забележливо читањето светски бестселери на оригинален англиски јазик.
Галеријата на нашиот фоторепортер Борис Грданоски ја пренесува атмосферата од годинешниот 34. Саем на книгата во Арена Борис Трајковски, под покровителство на Министерството за култура, кој завршува в понеделник.
Под мотото „Сакаш да бидеш некој и нешто? Тогаш…читај!“ во текот на седум дена ќе бидат организирани над 3о промоции на нови изданија. На саемот учествуваат над 60 издавачки куќи кои покрај промоциите, носат и големи саемски попусти до 70%. (Л.С.)