САД воведуваат вештачка интелигенција во контролата на воздушниот сообраќај

Американската сојузна управа за воздухопловство, ФАА,  почнува да користи систем за вештачка интелигенција за управување со воздушниот сообраќај на три клучни аеродроми во пошироката област на Вашингтон почнувајќи од овој понеделник. Новата алатка, наречена SMART, е базирана на cloud технологија и ќе служи како поддршка за постојните системи. ФАА истакнува дека нејзината цел не е да ги замени контролорите на летот или да го реши проблемот со недостигот на персонал, пишува The Washington Times.

Алатката SMART (Стратешко управување со воздушниот простор, рутата и траекторијата) ќе анализира распореди на летови, временски прогнози, услови на аеродромите и други оперативни фактори за да ја предвиди густината на сообраќајот и потенцијалните доцнења. „Заедничката анализа им овозможува на ФАА, авиокомпаниите и операторите да ги идентификуваат и координираат најефикасните рути и времиња на поаѓање“, се вели во описот на алатката објавен од ФАА.

Новиот систем ќе биде воведен на аеродромите Роналд Реган Вашингтон Национал, Вашингтон Далес Интернешнл и Балтимор/Вашингтон Интернешнл Тергуд Маршал. Главната писта на Националниот аеродром Реган е најпрометната во Соединетите Држави.

Во јануари 2025 година, аеродромот беше местото на најлошата воздухопловна несреќа во земјата во последните децении, кога се судрија воен хеликоптер и патнички авион, при што загинаа сите патници и екипаж во двата авиона.

Контролорите на воздушниот сообраќај предупредуваа за сообраќајните метежи уште пред несреќата. Во јуни, ФАА додели договор за развој на технологијата со вештачка интелигенција на компанијата „Air Space Intelligence“ со седиште во Вашингтон.

Технологијата има за цел да ги намали доцнењата на летовите, да го подобри протокот на сообраќај и да го зголеми капацитетот на воздушниот простор. „Откако ќе ја распоредиме, фундаментално ќе го промениме начинот на кој управуваме со воздушниот простор и ќе елиминираме илјадници доцнења и откажувања“, изјави министерот за транспорт Шон Дафи во јуни.