САД, ЕУ и Британија разгледуваат план за завршување на војната. Украина не е вклучена во тоа

Претставници од Соединетите Американски Држави, Европската Унија и Обединетото Кралство редовно се состануваат во изминатите неколку недели за да разговараат за планот за ставање крај на војната во Украина преку преговори, јавува Си-Ен-Ен, повикувајќи се на повеќе извори. Конкретно, според соговорниците на ТВ каналот, се разговарало за италијанскиот план.

Украина директно не учествува во овие дискусии, што, како што забележува Си-Ен-Ен, е во спротивност со изјавите на американските власти – „ништо за Украина без Украина“. Во исто време, како што е нагласено, САД не вршат притисок врз Украина, инсистирајќи на одреден план и не ја туркаат да преговара со Русија.

Поентата е да се утврдат приближните параметри на мировниот план што би можел да ѝ се понуди на Украина за понатамошна дискусија, пишува Си-Ен-Ен. Сепак, изворите на каналот се сомневаат дека Украина е подготвена за какви било договори кои предвидуваат територијални отстапки. Во исто време, два извори на Си-Ен-Ен изјавија дека САД навистина не го поддржуваат италијанскиот план, кој предвидува целосна автономија на Крим и Донбас.

Сè уште не е јасно дали дискусиите што ги водат САД и нивните сојузници ќе доведат до преговори. Како што забележува Си-Ен-Ен, властите на САД сè уште не гледаат реални изгледи за решавање на конфликтот по дипломатски пат. Украина и Русија исто така покажуваат мал интерес за сериозни преговори.