Руското обвинителство побара 18 години затвор за новинарот Еван Гершкович

Државното обвинителство на Русија побара дописникот на „Волстрит џорнал“ Еван Гершкович да се осуди на 18 години затвор во казнена колонија со максимална безбедност за шпионажа. Ова го објави Интерфакс, повикувајќи се на прес-службата на Регионалниот суд во Свердловск.

Казната на Гершкович ќе биде објавена на 19 јули.

Новинарот е обвинет дека „собирал доверливи информации за активностите на одбранбеното претпријатие „Уралвагонзавод“ за производство и поправка на воена опрема по задача од ЦИА“. Тој ја негира вината.

Регионалниот суд во Свердловск во Екатеринбург започна со расправа за случајот на Гершкович на 26 јуни. Судот го заврши судењето на две седници. Тие беа држени зад затворени врати.

Еван Гершкович беше приведен во Екатеринбург во март 2023 година по посетата на Нижни Тагил, каде што се наоѓа одбранбената фабрика „Уралвагонзавод“. Новинарот потоа беше префрлен во Москва, а во истражниот затвор Лефортово се наоѓа од април 2023 година.

Новинари од целиот свет постојано бараа Гершкович да биде ослободен. Американските власти соопштија дека продолжуваат да работат на враќање на новинарот во татковината. Рускиот министер за надворешни работи Сергеј Лавров на 17 јули потврди дека прашањето за размената на Гершкович се разговара на ниво на разузнавачки агенции.