Руски олигарси под санкции добро работат во Летонија

Двајца бизнисмени за кои се смета дека се блиски до Кремљ непречено работат во Летонија – понекогаш со воена опрема. „Компаниите во Рига ги контролираат и лично и преку поставени луѓе“, пренесува независниот интернет портал „Инсајдер“. Според извештајот, станува збор за милијардерите Искандер Махмудов и Андреј Бокарев, кои меѓу другото ја опремуваат руската армија.

Во Летонија, двајцата ја поседуваат инженерската фабрика РЕР во Рига, која произведува електронски системи за возови, метро и јавен превоз и добива средства од ЕУ. Во Русија, од друга страна, тие се партнери во големи компании за јаглен и индустриски производи. Бокарев и Махмудов до 2017 година поседуваа и акции во компанијата за одбрана „Калашников“. Според податоците од „Инсајдер“ руските воени бродови сè уште ги опремуваат со дизел мотори до ден-денес.

Поради добрите односи со Кремљ, и двајцата олигарси се на списокот со санкции во Велика Британија. Но, „латвиските власти не гледаат закана за националната безбедност во Бокарев и Махмудов“, пишува „Инсајдер“.

Во Рига, на независната руска телевизија Дожд, која се прослави преку отворена критика на Кремљ и војната на Русија против Украина, неодамна ѝ беше одземена дозволата за емитување поради известувањето за војната во Украина. Причината за ова беше објавата за оние кои беа принудени да се мобилизираат на фронтот, во која модераторот остави впечаток дека собира помош за руските војници. Медиумскиот регулатор го оцени ова како „закана за националната безбедност“.