Русите се уморни од пропагандата: Секој трет престанал да гледа телевизија

Државната пропагандна машина, што се спроведува во Русија на ниво без преседан од советско време, брзо ја губи својата публика. Иако Владата годишно издвојува сума споредлива со буџетот на еден голем регион за одржување на државните медиуми, бројот на граѓани кои гледаат телевизија опаѓа веќе пет години.

Од 2018 до 2023 година, уделот на населението кое, во принцип, не гледа телевизија, се зголеми речиси тројно – од 13% на 31%, рече Валери Федоров, генерален директор на Серускиот центар за проучување на јавното мислење (ВТсИОМ).

„Има сѐ помалку луѓе кои гледаат само телевизија“, рече тој. Истовремено, уделот на интернетот во медиумската потрошувачка расте. „Во 2018 година, 23% признале дека гледаат телевизија, но никогаш не влегуваат на интернет. Сега е уште помалку – 16%“, рече Федоров.

Нивото на довербата на Русите во телевизијата, каде што во повеќечасовни ток-шоуа, провладините „експерти“ се закануваат со нуклеарна војна и повикуваат на враќање на практиките на сталинистичката репресија, исто така опаѓа.

Истражувањето на „Откритие банк“спроведено на крајот на минатата година покажа дека нивото на недоверба во телевизиските информации достигна 44 отсто. За прв пат, бројот на луѓе кои и веруваат на ТВ (42%) се покажа помал од оние кои се скептични за тоа.