Русија вели дека платила 117 милиони долари камата од еврообврзница
Руското Министерство за финансии во четвртокот соопшти дека е исполнета нејзината обврска за исплата на камата од 117 милиони долари на два купони за еврообврзници и дека одделно ќе го ажурира пазарот за тоа дали исплатата била депонирана на сметката на платежниот агент Citibank (C.N), јави Ројтерс.
Санкциите поради настаните во Украина ја исклучија Русија од глобалниот финансиски систем и го блокираа најголемиот дел од нејзините златни и девизни резерви. Исплатата на двете еврообврзници, кои доспеваат во среда, е првиот тест на Москва во исполнувањето на нејзините обврски за надворешниот долг по воведувањето на западните санкции.
Филијалата на Citi во Лондон не одговори веднаш на барањето за коментар.
Сопственик на обврзниците со седиште во Европа, изјави за Ројтерс во четвртокот дека некои сопственици на руските суверени обврзници деноминирани во долари кои требаше да добијат купонска исплата во средата сè уште не ги добиле средствата.
Руското министерство за финансии планираше да испрати еквивалентна сума за исплата на камата во рубли, доколку исплатата во долари не стигне до странските обврзници, нешто што агенцијата за кредитен рејтинг Фич рече дека ќе претставува суверено неисполнување на обврските, доколку не се коригира во рок од 30-дневен грејс период.
Русија има 15 меѓународни обврзници со номинална вредност од околу 40 милијарди долари кои се неподмирени, од кои околу половина поседуваат меѓународни инвеститори.
Купонските исплати доспеани на 16 март се први од неколкуте, со уште 615 милиони долари доспеани во остатокот од месецот. Првата исплата на главнината доспева на 4 април кога доспева обврзницата од 2 милијарди долари.
Самите обврзници се издадени со мешавина од услови и договори. Обврзниците продадени откако Русија беше санкционирана поради нејзината анексија на Крим во 2014 година, содржат одредба за плаќања во алтернативна валута. За обврзниците наведени по 2018 година, рубљата е наведена како алтернативна опција за валута.