Русија веќе окупира една петина од украинската територија

На 29 мај, Украинецот Алексеј Бокоч објави мапа на својата Фејсбук страница, каде ја заокружи територијата на Украина, окупирана од Русија од 2014 година. Објаснувањето вели дека површината на окупираната  територија е 123.229 квадратни километри (ова е нешто повеќе од 20% од површината на Украина во меѓународно признатите граници, која е 603.549 квадратни километри).

Бокоч постави и карти на некои европски земји, во чии граници е заокружена територија на приближно иста површина. Тоа е околу половина од Италија и Велика Британија или Швајцарија и Австрија заедно. Или колку поранешната Чехословачка.

Сите овие мапи Бокоч ги коментираше на англиски: „За моите европски пријатели! Само имајте го на ум овој регион на Украина окупиран од Русија кога ги слушате изјавите на вашите политичари“.

Бокоч не прецизираше дали сам ги направил мапите и од каде се податоците за нив. Мапите на окупираните територии на Украина ги објавуваат украинските и руските медиуми, Американскиот институт за проучување на војната и британското воено разузнавање. Исто така, карта на областите кои беа под окупација и каде се водат непријателства беше објавена од Министерството за социјална политика на Украина.

Но, поверојатно е дека изработувачот на мапи ја пресметал површината на окупираната територија со исцртување на линијата на фронтот на Google Maps. Независниот руски медиум „Медуза“ го направи истото за да ја провери исправноста на пресметките. Според „Медуза“, површината на украинската територија окупирана од Русија се покажа како поголема – не 123.229, туку 143.886 квадратни километри (ова е речиси 24% од територијата на Украина).